Anëtari i kryesisë së Partisë Demokratike, Enno Bozdo komentoi shpalljen “non grata” të ish-kryeministrit Sali Berisha, pak ditë më parë nga Departamenti Amerikan i Shtetit.
Bozdo u shpreh në një intervistë në “Breaking News” se Berisha me qëndrimin e tij, tregoi një lidership të vërtetë në një situatë kaq të nxehtë.
Ai tha se beson që ish-kryeministri Sali Berisha, me shumë dinjitet do t’i shkojë kësaj lufte deri në fund, duke pasur mundësinë për të pastruar emrin dhe veten e tij, ashtu siç i takon një lideri historik të PD.
Eno Bozdo: Qëndrimi i PD erdhi menjëherë pas qëndrimit të zotit Berisha, i cili e bëri shumë të qartë se ai do të përballej me dinjitetin e tij, ai do të përballej personalisht me këtë akuzë dhe tha që do të merrte të gjithë hapat ligjorë që i ka ndërmarrë, për të pastruar emrin, dinjitetin e tij dhe të familjes së tij.
Besoj që zoti Berisha tregoi lidership në një çështje kaq rëndësishme dhe të nxehtë. Është e tepërt të them se vërtet ka qenë një situatë shqetësuse.
Besoj se Berisha me shumë dinjitet do t’i shkojë kësaj lufte deri në fund dhe mendoj se do të ketë të gjitha mundësitë për të pastruar emrin e tij, veten e tij, siç i takon një lideri historik të PD.
U kam thënë edhe miqve të mi, qofshin majtas apo djathtas se është një ditë e vështirë jo vetëm për PD, por për të gjithë Shqipërinë.
Kjo sepse, një qëndrimi tillë nga DASH për një figurë historike është vërtete një ngjarje që na duhet të meditojmë fort. Nuk është më një çështje politike, por shoqërore.
Emri i zotit Berisha është i lidhur fort me 30 vitet e fundit të pluralizmit të demokracisë në Shqipëri.
Nuk ka vend as për t’u kënaqur, për të bërë tifozllëqe politike, as edhe për t’u dëshpëruar pa fund. Unë besoj se zoti Berisha do t’ia dalë mbanë në këtë proces që besoj se do të zgjasë.
