E gjithë bota po mban sytë nga Izraeli për shpikjen e madhe që ndodhet në fazën e testimit një ilaç çudibërës kundër Covid-19. Bëhet fjalë për EXO-CD24, i cili vepron drejtpërdrejt në mushkëri dhe pa efekte anësore, lufton të ashtuquajturën “stuhi citokine”, domethënë reagimin imunitar potencialisht të rrezikshëm të trupit ndaj infeksionit.
Kështu, ky ilaç na është afruar aq shumë, pasi për të mos u varur nga vaksinat, Greqia po përfiton nga kjo shpikje e shkencës për ta aplikuar tek të sëmurët me Covid.
Profesori i Mjekësisë në Qendrën Mjekësore në Tel Aviv dhe shefi i Qendrës për Parandalimin e Kancerit, Nadir Arber takohet sot në Athinë me krerët e shëndetësisë Vassilis Kikilias dhe Sotiris Tsiodras në mënyrë që të përcaktojë detajet dhe të fillojë studimin klinik të ilaçit izraelit në shtetin fqinj për të trajtuar ndërlikimet serioze të COVID-19.
Në një lidhje Skype për “Wake Up”, mjekja Aurora Dollenberg tha se medikamenti është ende në fazë testimi dhe nuk mund të flasim me një eufori për një medikament çudibërës.
“Është një lajm shumë i mirë, por edhe kritik në Europë për faktin e thjeshtë se është pak i ekzagjeruar për nga euforia për të cilin po transmetohet nga Greqia ose nga Izraeli.
Kjo për faktin e thjeshtë që jemi në një fazë të parë klinike të testimit të këtij medikamenti dhe duke qenë se edhe numri i pacientëve që janë testuar me këtë medikament është shumë i vogël, akoma nuk mund të flasim me një eufori për një medikament çudibërës. Jemi akoma shumë herët për këtë gëzim të madh.
Medikamenti EXO-CD24 është një ilaç shumë i njohur prej dekadash të tëra. Ky medikament përdoret kryesisht tek tumoret, sidomos te tumoret e vezoreve, të mitrës etj, sepse aty edhe qelizat kanë një përhapje shumë të shpejtë.
Në rastin e pacientëve me Covid-19, qëllimi është që të frenohet përhapja e virusit nga njëra qelizë e mushkërisë te tjetra”, sqaroi mjekja.
