Njësia Fast Albania ka finalizuar mbrëmjen e djeshme një operacion për kapjen e kreut të një grupi kriminal që kryente vjedhje me armë dhe me dhunë, në Gjeorgji dhe në vende të tjera. Lokalizimi i 42 vjeçarit është bërë bazuar në inteligjencën informative dhe nga shkëmbimi i informacionit me homologët e Fast Mali i Zi.
Në kuadër të operacionit policor të koduar “Kryesori”, u kap dhe u arrestua përkohësisht, me qëllim ekstradimin drejt Gjeorgjisë shtetasi gjeorgjian Mindia Lavasogli, 42 vjeç.
Mindia Lavasogli (Goradze) strehohej në Tiranë dhe akuzohet si kreu i një grupi kriminal të dhunshëm, me aktivitet kryesisht në krimet kundër pasurisë në Gjeorgji dhe vende të tjera. Ai ishte në kërkim ndërkombëtar dhe përdorte pasaportë false, me emrin e një shtetasi ukrainas.
Gjykata e Kutaisi-t, Gjeorgji, me vendimin nr. 1/532-16, të datës 20.06.2018, e ka dënuar këtë shtetas, me 12 vjet burgim, për veprat penale “Pengimi i veprimtarisë profesionale të gazetarit, kryer me anë të kanosjes”, “Grupi kriminal” etj.
Vijon bashkëpunimin me homologët, me qëllim ekstradimin e shtetasit Mindia Lavasogli, për të vuajtur dënimin.
