Me këtë intensitet të marrjes së formularëve nga ana e kandidatëve të listës së PD dhe të LSI, pas djegies së mandateve, Rama beson me sa duket se mund të bëjë 94 vota për shkarkimin e Ilir Metës nga posti i Presidentit. Argumentin kushtetues për shkarkimin e tij e ka të formuluar, dhe bëhet fjalë për shkeljen e Kushtetutës së vendit, në rastin e mosdekretimit të ministrave të rinj, konkretisht të Ministrit të Jashtëm Cakaj. Mister mbetet fakti nëse Meta do të reagojë ndaj Ramës për ta përshpejtuar shkarkimin, megjithëse ka një problem të vogël: Monikës ka nisur t’i shijojë drejtimi i LSI. Urojmë që Meta, në se shkarkohet, ta gjejë gjuhën e përbashkët në negociimin me Monikën, për të mirë të opozitës
Ilir Meta është zbutur shumë, duke qënë herë pas here dhe kundër bashkëshortes së tij në krye të LSI, Monika Kryemadhi, sidomos për linjën radikale që po ndiqet nga opozita.
Një skenar i Presidentit për t’u shfaqur ndoshta mbi palët, është mendimi tërësor i aktorëve politikë, mediave por dhe qytetarëve, ata që me dashamirësi justifikojnë qetësinë e Metës.
Gjë që nuk ka asnjë të vërtetë brenda, pasi Meta kur sheh se i interesi i tij personal preket, bëhet përbindësh, duke shkuar madje deri dhe një shkelje kuishtetuese, siç ishte rasti i ditës së zgjedhjeve të 25 qershorit 2017, kur nga Lezha bëri thirrje për armatosjen e qytetarëve.
Pjesa tjetër e shpjegon qetësinë e Metës me faktin se është trembur nga reforma në drejtësi dhe fakti se SPAK pikërisht me dosjen e tij të krimit dhe abuzimit mund ta fillojë punën. Dhe këtu shumica kanë të drejtë, pasi ish kreut të LSI po i vërtiten prangat afër.
Por Ilir Meta është bërë me të vërtetë “qengj” i urtë dhe po merret vetëm me vizita jashtë vendit, me dekorime, me OJQ-të apo me ndonjë eveniment tjetër, më shumë kulturor dhe shpirtëror në ndonë xhami, teqe apo kishë.
E vërteta është se Ilir Meta është kërcënuar nga Edi Rama me shkarkim nga posti i Presidentit të Republikës. Jo pa qëllim Rama në seancën e fundit parlamentare, ku u betuan dhe 4 deputetët e rinj të LSI pas djegies së mandateve të deputetëve, vendim i marrë nga Basha dhe Kryemadhi, deklaroi se do të merren vendime të rëndësishme për ligjin zgjedhor, reformën në drejtësi dhe elementë të tjerë në shërbim të qytetarëve.
Me këtë intensitet të marrjes së formularëve nga ana e kandidatëve të listës së PD dhe të LSI, pas djegies së mandateve nga opozita, rrezikon që Kuvendi të ketë 140 deputetë. Për pasojë Rama beson me sa duket se mund të bëjë 94 votat e nevojshme për ndryshimet kushtetuese por dhe për shkarkimin e Ilir Metës nga posti i Presidentit të Republikës.
Argumentin kushtetues për shkarkimin e tij e ka tashmë të formuluar dhe bëhet fjalë për shkeljen e Kushtetutës së vendit, në rastin e mosdekretimit të ministrave të rinj, konkretisht të Ministrit të Jashtëm Genti Cakaj.
Rama akuzoi që në në momentin e refuzimit të dekretit të ministrit Cakaj se Presidenti ka shkelur Kushtetutën në të gjitha pikat e saj dhe për ndërhyrje në punën dhe emërimet e kryeministrit që ka fituar në mënyrë absolute zgjedhjet dhe ka detyrim kushtetues të formatojë vetë kabinetin qeveritar. Ndërsa sipas Ramës, Presidenti vetëm sa i noterizon propozimet për ministra.
Rama, pikërisht me shkarkim nga posti e kërcënon Metën, dhe për pasojë Presidenti është bërë i urtë si “qengj”. Mister mbetet fakti nëse Meta do të reagojë ndaj Ramës për ta përshpejtuar shkarkimin, megjithëse ka një problem të vogël: Monikës ka nisur t’i shijojë drejtimi i LSI, pavarësisht se është një kryetare e deleguar e kësaj partie. Megjithëse urojmë që Meta, në se shkarkohet, ta gjejë gjuhën e përbashkët në negociimin me Monikën, për të mirë të opozitës./Pamfleti
