Lulzim Basha eshte nga ata qytetare te Tiranes, i cili kur te kthehet nga pushimet do ta gjeje rrugen poshte shtepise se tij te rregulluar, e shtruar me kalldrem, ndriçim dhe korsi biçikletash.
Rruga “Faik Konica”, te cilen Kryetari i PD e shkel çdo dite kur vjen ne shtepi, ishte nje rruge e lënë në harresë, ku mbizotëronte balta dhe pluhuri. Sot ajo eshte një nga rrugët më të bukura të Tiranës, qe vec familjes Basha, do i shërbejë edhe qindra familjeve që jetojnë në këtë zonë.
Teksa Basha ka zgjedhur që në këto ditë gushti, diku nga Hollanda ku po pushon, të shaje çdo nismë që sjell zhvillim ne Tirane, punonjësit e ndërmarrjeve të Bashkisë Tiranë punuan për t’i dhënë dorën e fundit punimeve të rrugës “Faik Konica”, ku ka shtëpinë kreu i opozitës.
Kryetari i Bashkisë së Tiranës, Erion Veliaj inspektoi punimet e kryera, ndërsa theksoi se falë vizionit dhe këmbënguljes sot Tirana ka një rrugë të shtruar me kalldrëm dhe mermer, si dhe të pajisur me korsi të dedikuar për biçikletat dhe me të gjithë elementët e tjerë shtesë si ndriçim, trotuare, rrjet elektrik, telefonik dhe kanalizimet e nevojshme. Ai falënderoi edhe qytetarët që bashkëpunuan dhe mundësuan që ky investim të bëhej sipas të gjitha standardeve.
“Kjo është pa dyshim një nga rrugët më të bukura të Tiranës. Siç thoshte Faiku i madh, ‘Shqipërinë s’e kuptova ndonjëherë’, shumë herë kemi pasur momente të tilla kritike në këtë rrugë, ku përpjekja për të bërë trotuare haste rezistencën e dikujt që duhej të tërhiqte pak avllinë e vet, dhe nevoja për një korsi biçikletash haste rezistencë nga i forti i lagjes, i cili thotë: Range im meriton të ketë gjithë hapësirën e mundshme. Në fakt, në një qytet demokratik, ka hapësirë edhe për Range, edhe për biçikletat, edhe për të vënë tavolinat për kafe, por edhe për një trotuar ku nënat me fëmijë, të moshuarit apo paraplegjikët me karrocë, të kenë mundësi për akses”, tha Veliaj.
Ai u shpreh se ndërtimi i kësaj rruge tregon edhe një herë se sa herë që bashkia ndërhyn për të investuar, sjell ndryshim për të gjithë komunitetin. “Kjo është një rrugë e cila, jo shumë e gjatë në distancë, por sigurisht shumë e gjatë në luftën dhe betejën për të ndryshuar mentalitetin. Në këtë rrugë i kemi parë të gjitha, nga grupet “mos ma prek parkun, teatrin, rrugën, mos ma prek këtë apo atë”, sepse me sa duket për disa njerëz, të jetuarit në mizerie është stil jete, ndërkohë aspirata e qytetit është të dalim nga mizeria, të jetojmë më mirë dhe gjërat bëhen më mirë jo kur nuk i prek, por kur i prek; ndaj vumë dorë në këtë rrugë që besoj është një ndër rrugët më bukura të Tiranës”, shtoi Veliaj.
Kryebashkiaku theksoi se rruga e re krijon mundësinë që përmes sistemit të pistonave të mund të kthehet në një hapësirë vetëm për këmbësorët, që mund të shërbejë edhe si vend për panaire të ndryshme. “Për të gjithë ata që duan të shohin vizionin se si e planifikojmë Tiranën, një rrugë e tillë e cila mund të kthehet dhe të konvertohet edhe në hapësirë pedonale me piston për të pasur një panair ushqimor, një treg fshatar, gjatë fundjavave, pra për t’i pasur rrugët shumëpërdorimshe, jo vetëm si pista për të xhiruar gomat, por edhe si hapësira ku komuniteti mund të mblidhet dhe nga rrugë mund të rikthehet në piacë, në një piacë lineare, ku njerëzit kalojnë kohën e tyre të lirë”, tha ai.
Natyrisht që rruga e re do të surprizojë edhe vete kreun e opozitës, Lulzim Basha, kur të kthehet nga pushimet.
