Kontratat e lidhura nga eksportuesit shqiptarë me kompanitë e huaja do të mbrohen nga goditjet që mund t’ju vijnë nga kursi i këmbimit. Qeveria ka nisur punën për të hartuar programin për ‘kursin industrial’ që në fokus do të ketë mbrojtjen e kontratave të bizneseve eksportuese nga zhvlerësimi i valutave.
“Kursi i këmbimit industrial nuk është gjë tjetër, veçse njohje e dëmit ekonomik që vijnë nga luhatjet e kursit të këmbimit. Kosto që deri më sot janë mbajtur nga bizneset, por duhet të jetë e përbashkët. Është një sektor që ka 650 biznese aktive me 65 mijë të punësuar, kemi qenë 750 biznese, por një pjesë janë të mbyllura dhe kjo përkthehet në humbje të vendeve të punës”, thotë kryetari i shoqatës ProEksport Albania Edvin Prençe.
Kjo lëvizje u premtua edhe gjatë fushatës elektorale dhe konsiston me fiksimin e kursit të këmbimit lekë-valutë, vetëm për eksportuesit që nëse monedhat e huaja zhvlerësohen biznesi të mos dëmtohet.
Në konferencën e zhvilluar për ‘Sektorin e Manifakturës dhe perspektiva drejt BE’, mbështetje u kërkua për investime në teknologji dhe kualifikim stafi.
“Shqipëria 2030 ka një kosto shumë të lartë dhe është përllogaritur në 7 miliardë euro që të bëhet e mundur që bizneset të mund të jenë të ngjashëm me bizneset evropiane. Investimi në teknologji dhe në trajnime të njerëzve, janë pikat për të cilat jemi në diskutime edhe me qeverinë”, tha Prençe.
Për të konkurruar tregun evropian që është objektivi kryesor, manifaktura thotë se po punon për të sjellë produkte të veçanta.
“Sektori ynë prodhon 40 mijë tonë mbetje në vit po punojmë për realizimin e ekonomisë qarkulluese për të bërë të mundur që këto mbetje të riciklohen që të jemi të veçantë në raport me vendet e tjera”, tha Prençe.
Ministria e Ekonomisë ka nisur punën për të hartuar programe të dedikuara për eksportet për të krijuar skema të reja për aksesin në financë si dhe për të ndihmuar biznesin për të shtuar vlerën e produkteve të tyre.
