E gjithë Gjermania po ngre pikëpyetje pas episodit të fundit të dridhjeve në publik të kancelares gjermane, Angela Merkel.
Edhe pse është konsultuar me mjekët për shkakun dhe ka bërë testime Merkel ende nuk ka publikuar rezultatet. Të enjten, gjatë një ceremonie zyrtare për të mirëpritur kryeministrin e ri të Danimarkës, të dy udhëheqësit thyen protokollin standard për t’u ulur në karrige që ishin vendosur në qilimin e kuq përballë kancelarisë.
Përpjekjet e Merkelit për të minimizuar episodet duke këmbëngulur se ajo është “shumë mirë” veçse e kanë ngritur shqetësimin e gjermanëve, të cilët ngrenë një pyetje në vendin e tyre të obsesionuar me privatësinë: A ka publiku të drejtë të dijë më shumë për gjendjen e saj?
Merkeli sigurisht nuk është e këtij mendimi.
“Mendoj se deklarata ime se jam mirë do të pranohet”, u tha ajo gazetarëve pas episodit të së mërkurës, duke shtuar, “mendoj se do të ikë aq më shpejt sa u shfaq”.
Megjithëse Merkel këmbëngul se ajo është e aftë për punë, ajo pothuajse nuk ka dhënë detaje të asaj që e mundon herë pas here. Fillimisht, kjo ka funksionuar në fillim, por episodi i fundit po e detyron vendin të rishikojë murin që për dekada të tëra ka ndarë jetën publike dhe atë private të politikanëve të saj.
Merkel është e gjithëpranuar si liderja më e rëndësishme në Europë, një fakt që e bën gjendjen e saj shëndetësore një çështje të rëndësishme që shkon përtej kufijve të vendit të saj.
Nëse gjendja e saj rëndohet, pasojat do të ishin domethënëse edhe në nivel ndërkombëtar. Ligjërisht, ajo mund të zëvendësohet në mënyrë të shpejtë nga çdo gjerman që ka mbushur moshën 18 vjeç, i cili mund të krijojë shumicë në parlamentin gjerman. Praktikisht, dalja nga politika aktive e gruas së fortë gjermane do të ishte një goditje masive.
Me pyetjet e ngritura për pasardhëses e saj të zgjedhur, Annegret Kramp-Karrenbauer, largimi i papritur i kancelares pothuajse me siguri do të krijonte një periudhë kaosi. Nuk ka asnjë garanci që koalicioni qeverisës i Gjermanisë do të vijojë të jetë i qëndrueshëm, për shembull, duke detyruar zgjedhje të reja, që nëse u besojmë sondazheve të tanishme, do të trazonin peizazhin politik të Gjermanisë dhe kjo do të kishte pasoja të thella për të gjithë Evropën.
Duke pasur parasysh atë që luhet, përpjekja e Merkelit për të shmangur komentet duket më e pakta një strategji e mirë.
Kjo është veçanërisht e vërtetë duke pasur parasysh se reputacion e saj si njeri i hekurt në politikë. Për shumë vite, ajo ka qenë personi që nuk ka munguar në samitet maratonë të Evropës, duke dalë para mediave në shumicën e herëve.
Kjo ishte e vërtetë edhe javën e kaluar, kur ajo foli para shtypit pas një sesioni negociimi maratonë dy-ditore për presidentin e ardhshëm të Komisionit, një takim që erdhi menjëherë pas takimit të G20 në Japoni.
Por pas 14 vjetësh në detyrë, a ka Merkel, e cila mbush 65 vjeç javën e ardhshme, a janë këto pasojat e lodhjes nga aktiviteti politik?
Në të vërtetë, askush nuk e di. Në shtypin gjerman nuk mungojnë teoritë për shkakun e dridhjeve të Merkelit, nga çrregullimi “Kreislauf” deri te stresi.
Kur ndodhi episodi i parë, gjatë një ceremonie për të mirëpritur presidentin e ri të Ukrainës më 18 qershor – ajo fajësoi temperaturat e larta në Berlin dhe shpjegoi se nuk kishte pirë ujë të mjaftueshëm.
Episodi i dytë ndodhi më 27 qershor, pak para se të fluturonte për në Osaka, ndërkohë që Merkel qëndronte brenda institucionit me presidentin gjerman Frank-Ëalter Steinmeier. Merkel më pas la të kuptohej se shkaku mund të ketë qenë psikosomatik, i shkaktuar nga shqetësimi për incidentin e parë.
Të mërkurën, pas rastit të tretë, ajo la të kuptohet se shkaku ka qenë psikologjik.
Shumë komentatorë gjermanë janë të alarmuar nga hipoteza se liderja e vendit mund të vuajë nga një problem psikologjik, por çështja është një patate e nxehtë në politikë.
Pasi Hans-Georg Maaßen, ish-kreu i shërbimit të fshehtë të inteligjencës të Gjermanisë, shkroi në Tuiter se “gjendja shëndetësore e një udhëheqësi të qeverisë nuk është çështje private”, por pati reagime të ashpra.
“Herr Maaßen, të kesh turp”, iu përgjigj Renate Künast, nga radhët e Të Blertëve.
Për pjesën më të madhe, mediat gjermane gjithashtu e kanë tepruar pak me çështjen e shëndetit të Merkelit.
Në edicionin e së mërkurës në televizionin publik Tagesschau, emisioni më i shikuar në Gjermani, një raport i shkurtër mbi dridhjet e Merkelit ishte vetëm pika e gjashtë në programin 15-minutësh.
E përditshmja konservatore “Frankfurter Allgemeine Zeitung” e raportoi ngjarjen shkurt në fund të faqes së saj të parë të enjten. (Faqja kryesore e gazetës kishte në qendër një raportim që kishte të bënte me Presidentin Steinmeier, i cili ka kërkuar më shumë mbështetje publike për politikanët që përballen me abuzime.)
Tabloidi “Bild” (në pronësi të bashkë-botuesit të POLITICO Europe, Axel Springer) ishte një nga mediat e pakta që e trajtoi çështjen më gjerësisht.
“Thjesht është diçka që nuk do të ndalet!”, shkruhej në faqen e parë të gazetës, pranë një fotografie të Merkelit, kapur në një prej momenteve të dridhjeve.
“Heshtja, përpjekjet për t’i minimizuar gjërat, nuk funksionojnë më”, përfundonte gazeta. / Politico.eu-TemA TV/
