Analisti dhe gazetari Frrok Çupi, ka sulmuar ish- kryeministrin Sali Berisha. Ai u shpreh se peticioni për dëbimin e ambasadores Yuri Kim është iniciuar nga Sali Berisha.
Çupi tha, se Berisha nuk mund të shpëtojë nga akuzat dhe nga e gjithë kjo luftë, Perëndimi del prapë i fituar.“Ky është një peticion politik. Politika nuk është e zonja që në fund të thotë isha unë. Këtu është një pisllik ku s’ka asnjë mirënjohje për aleatin më të madh të Shqipërisë, Amerikën.
Ata nuk mund ta ndryshojnë ambasadoren. Në Shqipëri po mendohet se diçka e madhe po vjen. Ndjejnë se mund te shpëtojë Sali Berisha nga akuzat, mund te shpëtojnë kriminelët çfarë nuk mund të ndodhë. Edhe një gjë është e sigurt, Perëndimi në këtë rast është prap i fituar. Këta duhet të tërhiqen nga lufta me SHBA se nuk mund të fitojnë dot. Do të përfundojnë shumë keq”, tha Çupi.
Ndërkohë, analisti Frrok Çupi në një reagim të gjatë ka “zbërthyer” vizitën e zyrtarëve amerikanë në Tiranë. Ai tha se ardhja e tyre shkaktoi jehonë.“Karen Donfried dhe Gabriel Escobar, më shumë shkaktuan ‘jehonë’ para se të zbrisnin në Tiranë, se sa në 36 orët që qëndruan në zyrat politike gjatë datave 28 dhe 29 prill.
Koha në Tiranë e ndarë mes zyrave të qeverisë dhe zyrave në ‘emigrim’ të PD në opozitë, ishin orë ‘të lehta’, pa asnjë rëndesë. Njerëz që ende nuk janë mësuar me mendjen e hapur të Demokracisë Perëndimore, mendonin se sapo të mbërrinin zyrtarët e lartë, këtu do të gjëmonin ‘daullet e shiut’. Këtyre nuk u del kurrë nga truri kultura otomane e endur në romanin e Kadaresë, me pikërisht titullin ‘Daullet e shiut’.
Kjo ishte diferenca, asgjë tjetër: Amerikanët erdhën, panë dhe fituan atë çfarë i kishin vënë vetes objektiv në këtë rajon ku po gjëmojnë ‘daullet e luftës’ nga Rusia. Asnjëri prej tyre nuk doli para kamerave, as u tërhoqën bujshëm si në rapsoditë politike të zakonshme këtu”, tha ai.
