Nga Anri Bala
Pasi Rama u “lebetit dhe u drodh” nga të mosbindurit e pacivilizuar, që i kërcënuan karrigen e pushtetit, pra Bardhi, Muli, Boçi, “Toçi e Poçi”… të cilët e ndjenë thellë këtë fitore, ashtu siç e kishin parashikuar, në telehalet e Shqipërisë “mësynë” oratorët gojëmbël, që u tregonin pjesës së mbetur të popullatës mospjesmarrëse në protestë, praktikisht 99.9% të shqiptarëve, se çfarë kishin humbur dhe çfarë kishte fituar Berisha dhe opozita e varur nga ballkoni me çengelin e tij!
Madje Lubonja dhe Bushati, u thanë me pompozitet opinionit publik, se protesta duhej e fortë dhe shkatërrimtare, pasi nuk mund të kuptohej pa dhunë… duke bërë një analogji me protestat në Francë apo dhe Gjermani. Sigurisht, Tosi dhe Andi i ish-Bllokut, jo atij të kuq të Ilir Metës, do kenë ngatërruar protestën me revolucionin e Tetorit të etërve të tyre, që nuk i njihnin rregullat e demokracisë apo ato të politikës në një vend demokratik.
Ndërsa udhëheqësit komik të mosbindjes së pacivilizuar, që si qëllim kishin eleminimin e pronës private dhe publike për inat të Ramës, tamam si nusja që për inat të vjehrrës shkoi me mullixhiun… i quajtën veprimet e tyre si fryma e protestës së popullit, e thënë ndryshe… e hoqën përgjegjësinë e tyre me një anë, duke deklaruar, se këtë herë ishte populli ai që e drejtoi protestën.
Për të mbështetur tezën e tyre, edhe ata njësoj si anal-istët e analeve antidemokraci, morën shembullin e Parisit, por harruan të thonë se dhuna nuk është fryma politike e një proteste, por vrima e madhe që po mbush me ujë anijen pa direk të Sali Berishës, na ishte një herë PD-ja.
Të krenohesh dhe ta trumbetosh si fitore tentativën për të djegur institucionet apo bizneset private, të djegësh pemë dhe kazana plehrash, të dhunosh gazetarë e të bllokosh ambulancat në rrugë… është vërtetë një çmenduri që i kap herë pas herë këtë strukturë sharlatanësh, që kur kanë humbur karrigen e fituar me turp dhe nuk mund të kuptojnë, se qëllimet nuk mund t’i justifikojnë mjetet e tyre kriminale.
Komentuesit politik antiramë, nuk mund të bindin asnjë shqiptarë me mend në kokë, se kjo lloj “vrime” politike nuk ka për qëllim për të na kthyer në pushtet Sali Berishën dhe Ilir Metën, të cilët nuk ka protestë që i zbardh dhe i çliron nga e zeza e jetës së tyre në drejtimin e vendit.
Kjo e bënë më të vështirë se kurrë kthimin e këyre forcave politike në pushtet, sepse shqiptari mes të kaluarës së përfaqësuar nga Berisha dhe Meta dhe zhvillimit kaotik por paqësor të drejtuar nga Rama, zgjedhin këtë të fundit.
Kutia e votimit e ka provuar, se sa larg janë ata që mbledhin turma për të shkatërruar, me këta që kërkojnë njerëz për të punuar… E thënë shkurt, nëse Berisha është e keqja absolute, Rama është e keqja relative.
Berisha dhe PD-ja e tij kaotike dhe veprimet e tyre destabilizuese nuk gëlltiten nga asnjë qytetar jo trushpëlarë dhe janë një votë vendimtare pro për qëndrimin në pushtet të Ramës dhe të PS-së.
Sa më shumë që Berisha thërret nga ballkoni për revolucion e qeveri teknike para idhtarëve, aq më të qetë e bënë gjumin qeveria dhe Rama në Surrel i “tmerruar” prej Mulit.
Për sa kohë do të gjeja në kutinë e votimit të vetmin alternativë tritolin edhe unë do të votoja Ramën… gjithë jetën, deklaroi dje një gazetar italian./Ekskluzive.al
