Gazetari Artan Hoxha ka folur dje për mediat pas dëshmisë që ka dhënë nëPolicinë e Tiranëspër ngjarjen e 21 janarit të vitit 2011, ku mbetën të vrarë katër persona.
Gazetari theksoi se dosja duhet të merret nën hetim nga SPAK. Sipas tij, kjo është mundësia e fundit për të zbardhur dhe hetuar këtë ngjarje të rëndë. “Nuk është se vura re sa kohë qëndrova, por vura në dispozicion të çështjes, Prokurori kishte deleguar detyrat për oficerët e policisë gjyqësore dhe ata më kërkuan të deklaroja lidhur me çështjen. Përshëndes prokurorin që reagoi dhe që ky detaj i ri t’i japë nxitje hetimit.
Kërkoj që këtë çështje ta marrë në dorë SPAK, e duhet ta hetojë SPAK. Duke pasur parasysh që është krim shtetëror ku janë përfshirë nivelet më të larta të shtetit, ka nevojë për hetim nga Prokuroria e Posaçme. Kjo është mundësia e fundit për ta zbardhur dhe hetuar në mënyrë shteruese “21 janarin”. Së pari se ka kaluar shumë kohë, e dyta se kemi SPAK, e treta se kanë ndryshuar kohërat dhe nuk jemi në presion.
Nëse kalon dhe ky moment, do jemi shumë vonë për t’i dhënë përgjigje familjarëve. Të qetësohen shpirtrat e të vrarëve. Janë vrarë para kamerave, janë vrarë me duart në xhepa, nuk ishin në perimetrin e hyrjes së Kryeministrisë. Të zgjidhet një herë e mirë kjo histori”, deklaroi ai.
Ndërkohë gazetari Hoxha shprehu bindjen se hetimi do të vazhdojë. “Do të ketë persona të tjerë që do të thirren”, u shpreh ai. Po ashtu, Hoxha komentoi dhe reagimin e Berishës.“Nuk më zhgënjeu në deklaratën që bëri sot, por më zhgënjeu te pjesa e imagjinatës, nuk është më aq kreativ sa çka qenë më para. Ta katandisësh këtë përgjim te Ardi Veliu, mendoj se ai është i shqetësuar nga fakti i ri që ka dalë”, nënvizoi gazetari Hoxha.
