Edhe pse përpiqet të tregohet se është i kulluar, Gazment Bardhi ka hesape për të larë me drejtësinë shqiptare, pasi akuzohet se është përgjegjësi politik përgjegjës politik, për vrasjen e Pjerin Xhuvanit, të ndodhur në Elbasan para zgjedhjeve të 25 prillit 2021. Dy ditë më parë ish-efektivi i RENEA-s, Arbër Paplekaj u njoh me pretencën e prokurorisë gjatë seancës në Gjykatën e Elbasanit.
Ai dëgjoi në heshtje prokurorin, teksa artikuloi kërkesën për dënimin me 25 vite burgim. Paplekaj, i cili asokohe ishte dhe truproja e zotit Bardhi, akuzohet për vrasjen e eksponentit të Partisë Socialiste, Pjerin Xhuvanit 4 ditë para zgjedhjeve parlamentare të 25 prillit 2021.
Por ndërsa prokuroria ka “gozhduar” shtetasin Paplekaj, Gazment Bardhi që ka qenë “koka” e grupit të mbrojtjes së votës që shkaktoi vrasjen e Xhuvanit në Elbasan, ka arritur t’ia hedhe paq deri më tani. Ai vijon rutinë e tij dhe aktivitetet politike, duke mos i hyrë gjemb në këmbë”, edhe pse duhet të japë llogari për këtë ngjarje dhe pse jo të merret i pandehur nga Prokuroria e Elbasanit, duke qene se ka qenë edhe drejtues politik i Partisë Demorkatike për Qarkun Elbasan.
Pra, nisur nga fakti që hetimit për këtë vrasje që përgjaku zgjedhjet parlamentare të 25 prillit po shkojnë drejt fundit, është e udhës që prokuroria të trokasë edhe tek Bardhit, të cilit duhet t’i kërkojë llogari. Megjithatë, implikimin e Bardhit në vrasjen e Xhuvanit, e ka denoncuara edhe ish-kryeministri Sali Berisha. Ky i fundit së fundmi është afruar me Bardhin, pasi ish-Sekretari i Përgjithshëm i Partisë Demorkatike luan lojën e tij brenda PD, për shkak se është kthyer në vegël e tij, për të sabotuar rikthimin e Lulzim Bashën në krye të demokratëve. Por teksa sot janë bashkë,
Berisha disa muaj më parë ka akuzuar ashpër deputetin Gazment Bardhi si përgjegjës politik, për vrasjen e Pjerin Xhuvanit, të ndodhur në Elbasan para zgjedhjeve të 25 prillit 2021. “Gazment Bardhi lufton për të shpëtuar shpirtin e tij. Unë e kuptoj luftën që bën për të shpëtuar shpirtin, por prapë është i pashpresë. Të zbardhë rolin e tij në vrasjen në Elbasan, e them sepse ai nuk ishte, askush s’është për t’u vrarë në konceptin tim. Bardhi, përgjegjës direkt politik për atë gjakderdhje në një lagje që mund të mos ketë pasur gjakderdhje ndonjëherë. Para se të rrijë të merret me këto të shkojë të japë sqarime”, deklaroi Berisha.
Bardhi pranon ekzistencën e grupit
Por vrasja e Pjerin Xhuvanit në Elbasan zbuloi skandalin se Partia Demokratike, kishte ngritur një grup të armatosur, të quajtur Struktura për Mbrojtjen e Votës” (SMV), e cila kishte në përbërje ish-punonjës të Policisë së Shtetit. Konfirmimi erdhi me zë dhe me figurë nga ish-Sekretari i Përgjithshëm i Partisë Demokratike, në atë kohë, Gazment Bardhi. Sipas Bardhit, personi që sot është nën arrest për vrasjen e Pjerin Xhuvanit, Arber Paplekaj, “ishte pjesë e Strukturës për Mbrojtjen e Votës në Elbasan”.
“Ai nuk është kriminel, as vrasës. Është ish-efektiv i Policisë së Shtetit dhe ish-shoqërues në Ambasadën Amerikane në Tiranë. Për shkak të punës që kryen në këtë moment disponon armë me leje nga Policia e Shtetit. Strukturat e Mbrojtjes së votës, kanë në përbërje ish-punonjës të Policisë së Shtetit”, është shprehur Bardhi gjatë një komunikimi me gazetarët, pak minuta pasi ka ndodhur ngjarja e rëndë që përgjaku fushatën elektorale.
Për me tepër, kreu i listës së PD-së për Elbasanin, Gazment Bardhi, akuzoi policinë se sipas tij nuk i kapi autorët e përplasjes me armë duke u marrë me gazetarët. Ndër të tjera nënvizoi se personat e përfshirë në shkëmbimin e zjarrit ishin akuzuar edhe më herët nga demokratët si pjesëtarë të krimit të organizuar në qytet. Nga të gjitha këto episode, rezulton se Gazment Bardhi është i implikuar në vrasjen e Pjerin Xhuvanit, edhe pse nuk është ai personi që ka shkrepur armën.
Me deklaratën për grupe të armatosura për mbrojtjen e votës, ngrihen dyshime se Gazment Bardhi priste një përplasje me armë, e që në fakt ndodhi. Ka kaluar më shumë se 2 vite nga krimi i rëndë që përgjaku fushatën zgjedhore të 25 prillit, Gazment Bardhi, përveçse është thirrur për të dëshmuar, është lënë i lirë, pa dhënë përgjegjësi për ngritjen e grupeve të armatosura. Ndërkohë që disa zyrtarë policie dhe autori Arbër Paplekaj rrezikojnë disa vite burg./Rigels Seliman
