Qeveria gjermane po lobon mes vendeve anëtare të Bashkimit Evropian për hapjen e negociatave për Shqipërinë. Sipas Reuters, Gjermania u ka propozuar vendeve anëtare të BE-së një plan për hapjen e negociatave të anëtarësimit. Nëpërmjet këtij plani, Gjermania u sugjeron vendeve anëtare nisjen e procesit edhe për Shqipërinë, por në aspektin parimor dhe në këmbim të përmbushjes së një sërë kushteve.
Qeveria gjermane po lobon që BE të hapë negociatat për Shqipërinë para fundit të vitit 2019, por nuk ka vendosur një datë të caktuar për shkak të kushteve zyrtare që duhet të përmbushë Tirana. Sipas Reuters, ky plan që ka hartuar Gjermania, u është prezantuar vendeve të BE-së këtë javë. Ky plan mund të shërbejë si një kompromis mes atyre vendeve të BE që kërkojnë të afrojnë vendet e Ballkanit dhe atyre që e shohin me skepticizëm afrimin e tyre si Franca, Holanda dhe Danimarka. Plani në fjalë shpreh mbështetjen edhe për Maqedoninë e Veriut dhe sugjeron që takimi i parë ndërqeveritar mes ekzekutivit të Shkupit dhe zyrtarëve evropianë të mbahet nga fundi i këtij viti. Në lidhje me Shqipërinë ky plan propozon disa reforma që Tirana duhet t’i përmbushë përpara këtij takimi. Këto reforma nisin me plotësimin e vendeve vakante të gjykatave dhe shkojnë deri tek rregullimi i ligjeve elektorale, si edhe ngritja e strukturave siç është SPAK, BKH dhe lufta kundër korrupsionit. Ndërkohë kujtojmë se edhe më herët qeveria gjermane ka ndihmuar për ecjen e mëtejshme të Shqipërisë. Kryeministri Edi Rama deklaroi pak kohë më parë se qe kancelaria Angela Merkel ajo që mori “PO-në” dhe bindi Bundestagun gjerman që të vendoste pro hapjes së negociatave për Shqipërinë.
“Ishim ne që i kërkuam shqiptarëve që ta pastronin sistemin, dhe a kanë faj që e pastruan sistemin dhe nuk ka Gjykatë Kushtetuese, a duhet tu hedhim faj apo t’i përgëzojmë”, u tha Merkel deputetëve, sipas Ramës. Nga ana tjetër ambasadori i Bashkimit Evropian në Shqipëri, Luigi Soreca ka qenë tejet optimist dhe pozitiv për hapjen e negociatave. Ai e ka cilësuar reformën në drejtësi si pjesë e historisë moderne, ku bëri thirrje të mos ketë vonesa të pajustifikuara për krijimin e SPAK dhe BKH.
