Situata në kampin e Lëvizjes Socialiste për Integrim nuk është e qetë.
E detyruar nga Partia Demokratike, Monika Kryemadhi është detyruar që të deklarojë se do të djegë mandatet e LSI-së, edhe pse më parë betohej se kjo gjë nuk do të ndodhte, pasi ato janë “mandate gjaku”.
Kryemadhi e mori vendimin për të ndjekur PD-në drejt radikalizimit të situatës, edhe pse shumë prej deputetëve të saj, ishin kundër djegies së mandatave.
Njëri prej tyre tashmë ka dalë hapur, duke thënë se nuk ka ndërmend ta dorëzojë mandatin e tij, për hir të Sali Berishës.
Bëhet fjalë për një nga deputetët më të rëndësishëm të LSI-së, Lefter Koka, i cili mban peshën e kësaj partie në gjithë Qarkun e Durrësit.
Pas vendimit të tij për të mos e dorëzuar mandatin, gazetare “zyrtare” e Ilir Metës dhe Monika Kryemadhit, “Koha Jonë”, ka nisur një sulm të ashpër ndaj Kokës.
Duke përdorur fjalët e dhëndrit të Sali Berishës, kjo gazetë thotë se Lefter Koka është kapur nga Rama me me tenderin e inceneratorëve prej 178 milionë euro.
Tashmë brenda LSI-së ka shpërthyer “lufta e ftohtë” dhe fundi i saj nuk dihet.
Por është e qartë se kush do të guxojë të dalë kundër Kryemadhit, do të shantazhohet si Lefter Koka.
(TemA)
