Gazeta Tema (Antena brenda familjes)
Muli sot mori detyrë nga Doktori të mbronte gjyqtarin Bani nga sulmet që po i bëhen pas vendimit për Veliajn.
-Duhet mbrojtur në dy pika të forta, tha Doktori.
E para, ka një histori kur ka qenë 17 vjeç dhe ka kryer një krim ordiner, por meqë ka qenë nën moshë, e kanë çuar në shkollë riedukimi në Kavajë.
Gazi më tha që kur ishin te Ministria e Drejtësisë, i zhdukën dokumentet, por sidoqoftë duhet bërë një kërkim që të mos i gjejnë.
E dyta, duhet të sigurohemi që janë zhdukur letrat nga Ministria e Brendshme kur e kanë kthyer nga Greqia, pasi nuk e ka deklaruar në formular.
Ai nuk ka bërë ndonjë krim të rëndë, por duhej ta kishte deklaruar.
Puna është që në atë kohë në Sarandë ka qenë OPGJ Altin Dumani dhe ai ia di këtë sekret, dhe kam hall se mos me këtë sekret i bën presion dhe mund ta përdorë kundër nesh ndonjëherë.
Pasi mori detyrën, Muli nuk dinte nga t’ia niste.
Filloi të hetonte për këtë punën e krimit ordiner në moshë të re, por nuk po e gjente dot.
Pyeti në Sarandë, i thanë se në atë kohë i kanë vrarë një xhaxha për konflikte dhe se pastaj iku në Greqi, ku ndryshuan emrin dhe nëna e babai, nga çamë që ishin, u bënë me emra grekë. Tjetër gjë nuk i dilte.
Pyeti në Kavajë dhe aty nuk gjeti gjë.
-Po i raportoj Doktorit që kontrollova, i tha Muli, Lelos, por puna nuk është të gjejmë ndonjë gjë që ta kemi edhe ne në dorë, se mos na del nga kontrolli.
Këta thonë e kontrollon Gazi se kanë qenë shokë zyre në Ministrinë e Drejtësisë në kohën e Halimit, po ku i dihet, se përse mund ta përdorë Gazi.
Ndaj duhen gjetur patjetër dhe duhen ruajtur.
-Nuk e di, tha Lelo. Detyra ime është ta mbroj në shtyp.
Me këto çështjet policore merru vetë se ty të kemi ekspert.
