Grid Rroji, ish-këshilltar i Sali Berishës në qeverinë e PD në vitet 2005-2009 dhe një ndër themeluesit e Partisë Demokratike ka komentuar përplasjet mes kryedemokratit Lulzim Basha dhe ish-liderit demokrat, ndërsa ka shpërthyer në sulme dhe akuza të forta në adresë të këtij të fundit.
Ish-kryeministri Berisha nxori dy ditë më parë mbështetësit e tij në protestë para Kryeministrisë, ndërkohë që dje mësyu në selinë blu, ku njëri nga besnikët e tij ushtori edhe dhunë, duke shkallmuar derën e një zyre në ambientet e saj. Por sa i takon këtyre zhvillimeve dje ka reaguar edhe zoti Rroji, i cili ka zbuluar prapaskenat.
Përmes një statusi në rrjetet sociale, ai theksoi dje se Berisha hyri me dhunë në PD për të fshehur dështimin e protestës. “Si ujk i vjetër i politikës Berisha e ktheu dështimin e djeshëm përmbys. Sot të gjithë do merren me hyrjen në seli e aspak me braktisjen që i bënë katundarët.
Saliu e kapërdiu të djeshmen dhe me lëvizjen e sotme i ndërroi bravën situatës. Vërtetoi se nuk kërkon përplasje, por marrëveshje, ama nuk e ka hiç problem me përdor dhunën deri në fund. Tani Lulit i ka mbetur të kundrojë si do çahen bravat e degëve dhe t’i denoncojë tek Ed Duqja.
Pra, midis Shilës dhe Karibdës. Sigurisht që ata që do i shpërthejnë bravat e Lulit do jenë të dëbuar me cen të thellë nga ndonjë vend Perëndimor, janë rreth 200 000 të tillë gjatë viteve. Por edhe ata të Florenc Hoxhës që përdor Luli nuk janë më të mirë. Kurse Duqja i ka bërë drejtorë komisariatesh të vetët”, shkruan ai.
Berisha s’fiton gjë më largimin e Bashës, SHBA s’e fal
Më tej Grid Rroji, ish-këshilltar i Sali Berishës në qeverinë e PD në vitet 2005-2009 theksoi ditën e djeshme se ish-lideri demokrat nuk fiton asgjë me largimin e Lulzim Bashës nga kryetar i Partisë Demokratike, pasi sipas tij, ai inatin e ka me Shtetet e Bashkuara të Amerikës dhe jo me shefin aktual të selisë blu.
Madje, zoti Rroji shtoi se pavarësisht këtyre përpjekjeve të dëshpëruara të Berishës, amerikanët nuk harrojnë kollaj dhe nuk e falin ish-kryeministrin. “Mirëpo luftën Saliu nuk e ka me Lulin se atë e han për mëngjes para se me nis dita. Lufta është me Lozhën dhe me Amerikën.
E kur i shpall luftë perandorive duhet me u mat mirë, sepse ato e kanë kujtesën e elefantit. Kjo punë nuk mbaron me kapitullimin e pritshëm të Lulit, por aty është veç fillimi. Saliu, si njeri me eksperiencë të madhe e di fort mirë këtë, por në këtë pikë nuk ka tjetër zgjidhje, por edhe nuk ja ndjen hiç për ju.
Lozha po ashtu në të gjitha komponentët e saj, sorrosistë, oligarkë e bizantinë nuk do t’ia dijë për shqiptarët, po thjeshtë ka mision skllavërimin tuaj për llogari të Sindikatës Ndërkombëtare të Krimit”, u shpreh ai. Ndërkohë zoti Grid Rroji ka kritikuar edhe kryeministrin Edi Rama, të cilin e ka etiketuar si diktator.
“Ed Duqja është nëse mundet edhe më i pashpirt se Saliu. Ai gjithmonë i ka parë katundarët shqiptarë si objekt talljeje e përçmimi. Mendoni se ai do ua ruajë nderin e pronën kur s’ka nder vetë dhe ju sheh si kafshë”, nënvizoi Grid Rroji, ish-këshilltar i Sali Berishës në qeverinë e PD në vitet 2005-2009 dhe një ndër themeluesit e Partisë Demokratike./Rigels Seliman
