Deputetja demokrate, Grida Duma duket se i ka përtypur të gjitha akuzat që ka lëshuar në adresë të ish-kryeministrit Sali Berisha dhe mbështetësve të tij.
Pasi Berisha u shpall “non grata” nga Departamenti Amerikan i Shtetit më 19 maj, Lulzim Basha vendosi që ta përjashtonte Sali Berishën nga Partia Demokratike, ndërkohë që ky vendim u duartrokit nga shumica e deputetëve të grupit parlamentare të PD.
Njëra prej tyre ishte ligjvënësja Duka, e cila doli publikisht dhe përshëndeti “syrgjynosjen” e Berishës, ndërsa Bashën e etiketoi si lider të madh që duhet të prijë demokratë. Por situata duket se ka ndryshuar, sepse zonja Duma ka ndryshuar kurs 180 gradë, teksa është bërë “armikja” më e madhe e zotit Basha dhe përkrahësja më e flakët e Berishës.
Qëndrimet radikale kundër Bashës, deputetja demokrate ka nisur t’i vërë në pah pas humbjes së PD në zgjedhjet e pjesshme lokale të 6 marsit, ku hapur fare i kërkoi Lulzim Bashës të dorëhiqet nga drejtimi i Partisë Demorkatike.
Madje zonja Duma ka dalë hapur edhe në krah të Berishës, ç’ka tregon se ajo nuk e ka problem të “lëpijë” ato që ka thënë për ish-kryeministrin dhe ithtarët e këtij të fundit, sikundër është aktivistja shqiptaro-amerikane, Evi Kokalari. Pra, nisur nga deklarata e ditëve të fundit që deputetja Duma ka dalë hapur kundër Bashës, tregohet qartë se ajo tashmë është hedhur në “prehrin” e Berishës.
Grida Duma sulmon Enkelejd Alibeaj
Por kritikat ndaj Bashës, përkrahja ndaj Berishës dhe rreshtimi si aleate e tij dhe Evi Kokalarit, nuk është e vetmja lëvizje e Dumës, pasi ajo tashmë ka nisur që të sulmojë edhe demokratët, duke treguar hapur se në politikë harrohen ato që ke thënë.
Dje teksa po i drejtohej sallës së Kuvendit, Grida Duma u ndal nga gazetarët për të komentuar zhvillimet e brendshme në Partinë Demokratike. Deputetja Duma është shprehur se në qëllimin për bashkimin e PD nuk duhet të vihen as kushte paraprake dhe as përjashtime, duke iu referuar këtu edhe Sali Berishës. Ajo ka hedhur akuza në drejtim të kryetarit të Komanduar, Enkelejd Alibeaj, i cili sipas saj, doli në një deklaratë me 3 pika, por që nuk ishte e dakordësuar me të gjithë pjesën e grupit të deputetëve.
“Nuk ka pasur një dakordësi të grupit të PD, ne kemi qenë shumë luajal edhe ditën që kemi bërë takimin, kur Basha nuk ishte dorëhequr,vendimi i grupit duhet të ishte i dakordësuar, vendim grupi kur nuk është gjysma e grupit nuk ka, nuk kërkojmë kushte kur kërkojmë bashkim, negociata prodhon rrethana të reja dhe këto duhet të prodhojnë bashkimi.
Duhet bërë një bisedë e thellë dhe aty le të diskutohen të gjitha, mund të jetë edhe Berisha, po s’ka arsye të kemi frikë nga asgjë që askush. Nuk do të thotë që duhet të kthehem pas nga 9 shtatori, arti i negociatës nuk nis as me kushte”, deklaroi Duma.
Përplasjet Kokalari-Duma
Ndërkohë gazeta po sjellë sot për lexuesin disa nga përplasjet dhe akuzat që aktivistja e djathtë dhe një nga mbështetëset më të flakta të Sali Berishës, Evi Kokalari ka hedhur në adresë të deputetes Grida Duma, gjatë kohës që kjo e fundit përkrahte Lulzim Bashën dhe ishte kundër ish-kryeministrit.
Zonja Kokalari shkroi pak javë më parë në rrjetet sociale ka sulmuar deputeten Grida Duma, nëpërmjet një statusi në rrjetet sociale, duke i përmendur asaj edhe familjen dhe duke sugjeruar se Duma nuk përfaqëson vlerat konservatore. “Grida Duma familjen e saj e ka shkatërruar.
Ky është fakt. Ka mundësi që PD-ja konservatore të filloj të stresoj sa e domosdoshme është besimi në Zot & familja? Gjeneratat e reja rriten të fortë në familje të shëndetshme. Një familje e shëndetshme respekton partnerin dhe nuk sodit në livadhet e botës. Modernizmi që ka dashur të fus George Soros nëpërmjet OJQ, ka pasur vetëm një qëllim – denigrimin e shoqërisë”, shkroi Kokalari.
