Nga Anri Bala
Kisha dëgjuar e çfarë s’kisha dëgjuar, kisha pare e çfarë nuk kisha parë, por “hajdut impotent” nuk më kishin zënë sytë gjëkundi. Këtë e dëgjova nga kryeministri im, kur u përgjigjej “akuzatorëve të rrugës” protestues dhe të “punësuarëve” të rrjeteve sociale 24/7, kur ato e akuzojnë si hajdut.
“Të gjithë ata që më akuzojnë mua për hajdut janë hajdut impotent”, ishte përgjigja e kryeministrit.
U përpoqa fort ta përktheja këtë kundërakuzë nga Rama, por asgjëkundi nuk e gjeta, as në fjalor akademikësh e as në zhargonet e rrugës. Me shumë mund arrita në konkluzionin tim, që duhet të jetë i njëjtë me shumë njerëz që e njohin Zotin Rama, se kjo shprehje i është shkruajtur gabimisht nga ata që mendojnë se mufkat e tij mund të merren për xhevahirë të leksikut shqip.
Mua kohët e fundit po më zhgënjen, sepse e kam konsideruar si një publicist të fuqishëm dhe orator i paarritshëm prandaj s’dua ta besoj fare që Rama të përdor shprehje të tilla, që nuk thonë asgjë dhe nuk e justifikojnë akuzuesin, por e rëndojnë më tepër!
Hajdut impotent! Hajdut që nuk je i zoti të vjedhësh ose nuk ke b*le të vjedhësh, sepse nuk të punojnë allatet e vjedhjes, që natyrisht sipas kryeministrit u punojnë të tjerëve, që ai i neh mirë, sepse u ka dhënë ndoshta pa dashje edhe mjetin edhe justifikimin.
Nëse do lind pyetja, se “kush është potent për të vjedhur?”, përgjigja dihet:
Të gjithë ata që kanë duart e gjata dhe në dorë thasët e hapur të parave të shtetit, që paguhen sa frëngu pulën pa bërë asgjë, sepse janë vëllai, motra, kunati, vjehrri, vjehrra, apo djali ose vajza e personave që shërbejnë me devotshmëri në kështjellën e pushtetit.
“Askushët”, si kurrë ndonjëherë, që nga qeveria e Ismail Qemalit, sot mbushin karriget e administratës së shtetit shqiptarë.
Nuk mund të besoj, se Rama ka lajthitur, e të thotë se qeveria e tij është qelibar, sepse do ishte një çmenduri vetëm ta mendosh dhe qytetarët do e bënin shumë herë më tepër fajtor se ç’është në të vërtetë.
Kurse akuzuesit kanë një faj të vetëm, vuajnë nga “hajnopauza”! “Hajnopauza”, do të kishte qenë emri më i duhur për “shpifsit”, që “vuajnë” nga mungesa e dëshirës për të vjedhur.
Ky ves është sport qeveritarësh, nuk u jep adreanalinë, e nuk i stimulon, sikurse i stimulon pushteti “hajdutët potent”, ndaj janë në të drejtën e tyre t’i urrejnë, të shpifin edhe duke thënë të vërtetën, por edhe t’i shajnë, nëse “e vërteta” quhet sharje.
Ndaj, kryeministri im, sa kohë të jesh në pushtet mos u mbro e ofendo se shahesh e fyhesh, për sa kohë shumica e oborrtarëve tuaj i kanë medaljone akuzat e korrupsionit dhe hajdutërisë, që bëjnë sikur drejtojnë shtetin, por mbushin “sepetin”!
Me dhimbje po të uroj të rrofshin “hajdutët potent”, se “hajdutët impotent” janë të padëmshëm… sepse nuk ta lënë me barrë qeverinë e ta hedhin kopilin te dera. /Ekskluzive.al
