Prokuroria e Posaçme po heton aferën me privatizimin e Kompleksit Partizani. Një vit më parë, kreu i grupit parlamentar socialist, Taulant Balla, bëri një padi ndaj ish-kryeministrit Sali Berisha, dhëndrit të tij Jamarbër Malltezi dhe ish-ministrit të Mbrojtjes Arben Imami, pasi dyshohet se kanë shkelur ligjin me privatizimin e kompleksit.
Dy ditë më parë Balla tha se SPAK nuk i ka dhënë informacion mbi hetimet. Gazeta “Sot” ju drejtua me një kërkesë Prokurorisë së Posaçme, e cila në përgjigjen e saj shprehet se procedimi penal për këtë rast është regjistruar që më 1 dhjetor 2020 dhe procesi hetimor po vijon normalisht.
Sipas SPAK po kryhet verifikimi i të dhënave dhe dokumenteve. “Më datë 01.12.2020, është regjistruar procedimi penal me nr.287, për veprën penale të parashikuar nga neni 287 i K.Penal. Ky procedim është në fazën e hetimit”, tha SPAK për gazetën “Sot”.
Për shkak të sekretit hetimor prokuroria nuk ka dhënë shumë detaje se çfarë kanë zbuluar hetimet, por fakti që dosja po hetohet është një sinjal se mund të ketë zhvillime. Edhe ne rastin e inceneratorëve ishte e njëjta situatë, ku për shumë kohë dosja ishte nën hetim, por u finalizua me disa urdhër arreste dhe që mund të ketë të tjera. Ndërsa dosja e Kompleksit Partizani rrezikon ish-kryeministrin Berisha, dhëndrin e tij dhe ish-ministrin Imami.
Skandali me Kompleksin Partizani
Por çfarë ka ndodhur realisht me skemën e privatizimit? Sipas të dhënave të Agjencisë së Pronave toka në fjalë ka qenë e pronarëve, por ajo i kaluar shteti dhe në vitin 1940 ata janë dëmshpërblyer nga qeveri italiane, pas vendi ynë ishte pushtuar nga Italia.
Madje pronarët janë shpërblyer me franga ari. Qeveria italiane kishte plane të bënte një aeroport aty dhe prandaj mori tokën. Madje toka është blerë nga Shefqet Vërlaci dhe Jako Mane. Toka, nga Rr. e Kavajës deri tek Rr. Durrësit është blerë nga italianët dhe më pas ka kaluar në duart e shtetit. Pra, pretendentët e këtyre pronave janë kompensuar një herë nga italianët dhe më pas toka është shtetëzuar, duke i kaluar në pronësi Ushtrisë.
Në vitin 2008 një grup peronash që pretendojnë se janë pronarë të truallit, nisë procedurat e kompensimit dhe përfaqësuesi ligjor i tyre ishte Jamarbër Malltezi, dhëndri i Berishës. Sipas marrëveshjes, Malltezi do të merrte jo më pak se 5 për qind të vlerës së pronave të kthyera. Sot ka me mijëra shqiptarë që luftojnë prej 30 vitesh për pronat e tyre dhe akoma nuk i kanë marrë, por ajo që bie në sy është se pronat e Klubit Partizani u kompensuan brenda 6 muajsh. Procesi nisi në qershor 2008 dhe në dhjetor gjithçka mbaroi. Pra këtu pati rol vendimtar dyshja Berisha-Imami.
Vlera e pronës
Ajo që bie në sy është se kemi një kompensim në qendër të Tiranës me vlerë tepër të ulët. Janë rreth 33 mijë metër katror tokë, ku shteti ka dhënë për pronarët 100 milionë lekë. Metoda e kompensimi përdorur nga grupi i ekspertëve është në kundërshtim të hapur me VKM 794 datë 21.11.2007 dhe të Udhëzimit Nr. 6364 datë 03.07.2008 “Për kriteret e vlerësimit të pronës shtetërore që privatizohet apo transferohet dhe procedurën e shitjes”, të cilët përcaktojnë që vlera e objekteve të privatizuara duhet t’i referohet çmimit të tregut të lirë.
“Fakti që ekspertët kanë vlerësuar në masën 10.109.000 lekë vlerën e objekteve mbi truall për para blerje dhe privatizim, vlerë kjo tepër e ulet në raport me sipërfaqen ndërtimore të saj apo dhe faktin se kjo zonë është zonë e miratuar për zhvillim ndërtimi, vendndodhja e saj në qendër të Tiranës provon fare qartë qëllimin kriminal të të gjithë personave të akuzuar”, thuhet në padinë e Ballës.
