Nga Rigels Seliman
“Në mënyrë që të bëhet sundimtar, politikani shtiret si shërbëtor”, kështu është shprehur dekada më parë gjenerali, shkrimtari dhe burrë shteti francez, Charles De Gaulle. E mesa duket kjo thënie është më aktuale se kurrë edhe në politikën shqiptare, e cila është përqafuar aq bukur nga kryetari i Partisë Demokratike, Lulzim Basha.
Ky i fundit pak ditë më parë i propozoi Kryesisë së PD nisjen e procesit të përzgjedhjes, konsultimit dhe seleksionimit të kandidaturave për zgjedhjet parlamentare dhe vendore. Vendimi i zotit Basha është një risi për politikën shqiptare, pasi për herë të parë kandidatët për deputetë dhe kryetarë bashkie do të kenë votën e anëtarësisë së Partisë Demokratike.
Kështu që, sapo ky udhëzim ka shkuar në tryezën e çdo dege dhe grupseksioni, të gjithë janë vënë në lëvizje, për të propozuar atë që mendojnë se do t’i përfaqësojë në pushtetin vendor dhe qendror. Ndërkohë që paralelisht me këtë, kryedemokrati Basha ka bërë një biçim “Mea Culpa”, pasi ka deklaruar se Partia Demokratike do të hapet dhe se janë të mirëpritur në këtë shtëpi të gjithë ata të larguarit apo siç njihen ndryshe “xhaketat e vjetra”.
Por duke qenë se është një çështjet tepër sensitive, desha edhe unë që them dy fjalë për këtë fushatën e re që ka mbërthyer partinë më të madhe të opozitës. Për mendimin tim, hapja e PD dhe mbyllja e Bashës i ngjan më shumë një lëvizjeve hipokrite fëminore, sepse ata që ikën nga Partia Demokratike, nuk kanë ndërmend të kthehen dhe se thirrja ka qenë thjeshtë demagogji.
Sapo u njoftua kjo gjë zyrtarët më të lartë të PD nxituan të deklaronin se për të “larguarit” nuk ka vend në parti, pasi ata kanë gjuajtur me gurë ndaj kreut të saj në këto vite që demokratët janë në opozitë. Ndërsa nga ana tjetër, dua që analizën tim ta ndal pak tek fakti që Partia Demokratike e ka nisur pak mbrapsht fushatën e saj.
Gjatë ditëve të fundit kam parë që shumë ish-deputetët që nuk njohin dhe i përkasin zonave, janë deleguar për të ndjekur procesin e hapjes së partisë dhe përzgjedhjes së kandidatëve për pushtetin vendor dhe qendror. I tillë është rasti i ish-deputetëve që janë zgjedhur deputetët në veri dhe janë deleguar në jug dhe anasjelltas, si dhe fakti ku në shumicën e rasteve, skundër është denoncuar edhe në disa media se kandidatët që propozohen nga baza janë të imponuar dhe sponsorizuar.
Tani o zoti Basha, unë dua të vë në dukje se Demokracia është zgjedhje, jo sondazhe. Demokracia kërkon pallto, jo dekolte. Kështu që, nuk mërzitem se gënjeve qytetarët, por mërzitem se nuk do të mund të të besojmë më.
