Hillary Clinton ka reaguar në lidhje me draft-opinionin e publikuar në mediat amerikane, ku thuhet se Gjykata Supreme pritet të shfuqizojë ligjin e abortit të miratuar federalisht në vitin 1973.
“Nuk është për t’u habitur. Por ende e egër. Ky vendim është një sulm i drejtpërdrejtë ndaj dinjitetit, të drejtave dhe jetës së grave, për të mos përmendur dekadat e ligjit të vendosur.”, shkroi Klinton në Twitter.
“Ky vendim do të vrasë dhe nënshtrojë gratë edhe pasi shumica dërrmuese e amerikanëve mendojnë se aborti duhet të jetë i ligjshëm. Çfarë turpi i plotë!”- shtoi ajo.
Projekt -opinioni prej 98 faqesh, gjoja i autorizuar nga gjyqtari Samuel Alito dhe i dalë në shtyp në atë që duket të jetë një shkelje e madhe e konfidencialitetit në SHBA, thotë se “Roe ishte jashtëzakonisht gabim që në fillim” dhe se “ne [shumica e Gjykatës së Lartë ] mendojnë se Roe dhe Casey (një tjetër vendim mbi të drejtën e abortit nga viti 1992, i cili la në fuqi vendimin e mëparshëm të gjykatës) duhet të anulohet.”
Gjyqtari, Samuel Alito, ka thënë në dokument sipas këtij drafti të publikuar se vendimi i vitit 1973 është i gabuar.
Nëse verifikohet ky dokument, ai do të përbënte një rast të pashembullt në historinë moderne të kësaj gjykate.
Gjyqtarët pritet të bëjnë të ditur vendimin për këtë rast në fillim të muajit korrik.
As Gjykata Supreme, as Shtëpia e Bardhë nuk kanë komentuar për këtë rrjedhje dokumentesh.
“Është koha për të rikthyer këtë çështje të abortit te përfaqësuesit e zgjedhur të shtetit”, raportohet se është thënë në dokument.
Udhëheqësja e Dhomës së Përfaqësuesve, Nancy Pelosi dhe lideri i shumicës në Senat, Chuck Schumer – të dy demokratë – kanë lëshuar një deklaratë pas rrjedhjes së informacionit.
“Nëse raportimi është i saktë, Gjykata Supreme do të shkaktojë kufizimin më të madh të të drejtave të njeriut në 50 vjetët e fundit”, është thënë në deklaratë.
Protestuesit po ashtu janë mbledhur jashtë Gjykatës Supreme për të shprehur zemërimin e tyre për raportimet mbi këtë çështje.
Vendimi i vitit 1973 u ka mundësuar grave në SHBA që të kenë të drejtë absolute për abort në tre muajt e parë të shtatzënisë dhe të drejta të kufizuara në tremujorin e dytë.
Gratë në të 20-at e tyre besohet se kryejnë më së shumti aborte në SHBA – më 2019 janë kryer rreth 57 për qind e aborteve nga kjo grup-moshë.
Amerikanet me ngjyrë kryejnë më së shumti aborte – 27 në 1,000 gra të moshave 15-44 vjeç.
Sipas Politico , gjyqtarët Clarence Thomas, Neil Gorsuch, Brett Kavanaugh dhe Amy Coney Barrett u renditën si të bashkuar me opinionin e Alitos, ndërsa tre gjyqtarët e emëruar nga demokratët – Stephen Breyer, Sonia Sotomayor dhe Elena Kagan kanë mospajtime në lidhje me vendimin.
Një vendim për të përmbysur ligjin e abortit dukej i mundshëm kur Gjykata e Lartë me prirje konservatore vendosi në dhjetor të ngrejë një proces gjyqësor mbi ndalimin e abortit nga Misisipi pas 15 javësh shtatzënie. Për shkak se lejimi i ndalimit për të ecur përpara do të ishte në kundërshtim me Roe , masa ngriti pritshmëritë që shumica konservatore në Gjykatë do të votonte për të rrëzuar çështjen.
Federata e Planifikuar Prindërore e Amerikës lëshoi ??gjithashtu një deklaratë në reagim ndaj draft opinionit të rrjedhur të hënën, duke shkruar, “nëse ky vendim del, 26 shtete janë gati të lëvizin shpejt për të ndaluar abortin, duke lënë më shumë se 36 milionë gra në moshë riprodhuese – dhe njerëz të tjerë që mund të mbeten shtatzënë – pa akses për abort”.
