Nga Anri Bala
Ndërsa reciton e turfullon çdo natë nga ballkoni i shtëpisë, Sali Berisha nuk ndalet së etikuar dhe mallkuar drejtësinë si bandë kriminale në shërbim të pushtetit, e unë mendoj se ka të drejtë për etiketimin, por duhet të pranoi se drejtësia ka ardhur si mbetje e dekantuar nga llumi i ish drejtësisë së plepave, që ai na dhuroi. E kjo që na la peshqesh sot, nuk është veçse një bandë frymore, që luan prej dekadash preludin e nënshtrimit në oborrin e tij.
Sot, më 21 Janar, Sali Berisha ulëret si hjeksi i pushkatimit të qyetetarëve në turmë, kurse drejtësia hesht dhe bënë sikur nuk ka ndodhur asgjë, madje SPAK i shpërfytyruar as që merr mundimin ta hetoj pas dhjetëra denoncimesh, për këtë masakër dhe pas vendimit të Strasburgut.
Prokuria e kanaleve, kazanave, plehrave, që krijon krime nga më qesharaket në emër të korrupsionit dhe krimit të organizuar, ia delegoi çeshtjen Prokurorisë së Qarkut Tiranë, e të jeni të sigurtë që do përfundoi si një dosje e harruar.
Më skandaloze ishte deklarata e ministrit të drejtësisë, që tregon pafuqinë e një shteti ndaj bandave kriminale të ish pushtetit, të “murgut” të izoluar në rrugën Mustafa Matohiti.
“Fakti që sot pas 13 vitesh, drejtësia për 21 Janarin si krim shtetëror është ende në ajër, tregon qartë se brenda sistemit të drejtësisë ka magjistratë me certifikatë vetingu të paaftë profesionalisht, që punojnë me mentalitetin e vjetër të mbylljes së dosjeve me procedurë apo skadim të afateve të procedimit, se kanë frikë të përballen me hetimin e dosjeve të rëndësishme”, deklaroi Ulsi Manja.
Ndaj Berisha ka të drejtë që e quan SPAK-un bandë, sepse mund t’i numërojmë me qindra vepra penale të kryera, që nga grushtet e shtetit e deri të krimet madhore ekonomike, si shitja e 4 HEC-eve, Gërdeci, CEZ-DIA, lejeve korruptive për ndërtime HEC-esh për militantët e qeverisjes, që u ka grabitur qindra miliona euro shqiptarëve dhe dhjetëra koncensione që ligjërisht nuk mund të zhbëhen… por që na bëjnë ta etikojmë edhe ne SPAK-un, me të vërtetë si një bandë… e hatashme frymore që luan për të.
Melodia që ka orkestruar kjo “bandë” me çeshtjen Partizani, është vrima e fundit e kavallit, e cila vlen vetëm për ta mbajtur nën trysni opinionin e qyetetarëve, se ne po luftojmë krimin në të gjitha krahët.
Por, këto dokrra pak njerëz mund t’i hanë! Ka ardhur koha që ky SPAK, nuk duhet toleruar aspak, sepse po i shkakton vendit një dëm më të madh, se sa fatura që na lanë plepistat.
Tallja me krimet e vrasjeve, yryshi dhe euforia me krime imagjinare konfliktesh në tendera, ku i dhemb vetëm humbësit dhe jo popullit, që as nuk ka fitur dhe as nuk ka humbur gjë… është një handikap i madh në këtë drejtësi patetike dhe të frikësuar që hiqet si e trimëruar.
Një gjë të tillë më në fund e kishte “kuptuar” edhe Rama, kur deklaroi sot publikisht:
“Presim drejtësi për 21 janarin. Pak më shumë se prej 1 muaj nga sot, do të marrim vesh nëse dosja e gjakut të 21 janarit do t’i kalojë apo jo SPAK, për të hapur hetimin mbi krimin shtetëror, apo do të vazhdoj të ngelet e mbyllur, Zoti e di sa kohë, në barkun e madh të Prokurorisë së rrethit gjyqësor Tiranë, pa shtyllë kurrizore. Këto janë shëmbëlltyra e drejtësisë aktualisht.”
Sali Berisha dhe të gjithë ish berishët, duhet të përgjigjen për veprat makabre të vrasjeve dhe jo për firma nga pakujdesia apo rutina e përhershme e firmosjes neglizhente të dokumentave zyrtare që nuk kanë dëmtuar askënd.
Ka ardhur koha, që pushkatimi i qytetarëve në turmë si një krim i rëndë shtetëror të marri drejtësi, por me çfarë shikojmë banda frymore e oborrit të Saliut, e etikuar nga ai vetë si banda Rama, ka humbur kallamin e klarinetës dhe po i bie “qemanes” pa tela të Nastradinit, që do ia dëgjojmë avazin e dëmit nesër./Ekskluzive.al
