Kryeministri Edi Rama ka deklaruar se qëndrimi që ka dalë këto ditë se Holanda është kundër Shqipërisë dhe pro Maqedonisë është i parakohshëm dhe përbën më shumë politikë të brendshme sesa realitet europian.
“Nuk mund të themi se Holanda është më e ndjeshme për standardet sesa Suedia, Gjermania apo Danimarka, por ky qëndrim fsheh një realitet që është politikë e brendshme dhe ka të bëjë me shqiptarët. Holanda ka zgjedhje, në mars po të shikoni kalendarin e zgjedhjeve në BE del edhe një logjikë mbi atë se pse hapet kjo çështje.
Ne kemi marrëdhënie të mirë me Holandën dhe unë kam miqësi me kryeministrin holandez, por kjo situatë është një realitet që mban në këmbë ekuilibrat politik.Siç bëjnë me shqiptarët sot, dikur thonin për Bullgarët kur shkruanin se kanë vrarë Papën, kurse për rumunët do na hanë lejlekët”, tha Rama.
Në fakt qeveria holandeze ka qenë vendi që ka kërcënuar me veto në Këshillin Europian për të mos hapur Konferencën ndërqeveritare me Shqipërinë. Holanda e ka ndarë Shqipërinë me Maqedoninë, për të cilën ka rënë dakord për të nisur Konferencën Ndërqeveritare.
