Prokurori Adnan Xholi është kandidati i parë që ka dorëzuar letrat për të drejtuar SPAK-un.
“Prokurori Adnan Xholi depoziton kërkesë dhe shpreh interes për drejtues të Prokurorisë së Posaçme kundër Korrupsionit dhe Krimit të Organizuar”, njoftoi Këshilli i Lartë i Prokurorisë.
Kreut aktual të SPAK-ut, Arben Kraja i mbaron mandati në 19 dhjetor dhe nuk ka të drejtë për t’u rizgjedhur. Kështu që gara është hapur për prokurorët e tjerë. Xholi sot dorëzoi dokumentet me kërkesën. Por cila është karriera e tij?
Xholi i njohur në qarqet e organit të akuzës si prokurori i besuar i amerikanëve para se të shkonte në SPAK ka mbajtur detyrën e Drejtorit të Drejtorisë Gjyqësore në Prokurorinë e Përgjithshme, ndërsa më parë ka ushtruar prej më shumë se 5 vitesh funksionin e Drejtorit të Kontrollit të Hetimit në institucionin qendror të akuzës.
Më herët, prokurori Adnan Xholi ka mbajtur poste drejtuese në prokurori lokale, si edhe për shumë vite ka qenë prokuror pranë ish-Prokurorisë për Krime të Rënda.
Xholi ka mbajtur vazhdimisht një profil tejet të rezervuar përballë mediave, pavarësisht se ka pasur në duar çështje të nxehta dhe interesi i gazetarëve ka qenë i madh.
Xholi është prokurori i parë i Republikës që ka thirrur për të dhënë dëshmi Kryeministrin, Kryetarin e Kuvendit, ministrin e Brendshëm, ish-kryeministrin, deputetë e persona të tjerë jo të zakonshëm. Është ndër të paktët prokurorë shqiptarë të nderuar me certifikatë mirënjohjeje nga Shtetet e Bashkuara të Amerikës.
