Pasditen e kësaj të premteje pritet të ekstradohet nga Dubai në Shqipëri, Florenc Çapja, i shumëkërkuari i drejtësisë shqiptare.
Lajmi konfirmohet nga Policia e Shtetit, e cila thekson se Çapja pritet të mbërrijë pasdite në Rinas.
“Policia e Shtetit, në vijim të bashkëpunimit mjaft të mirë me partnerët, si në aspekte hetimore, ashtu dhe në ato operacionale, dhe si rezultat i shkëmbimit të menjëhershëm të informacionit mes strukturave të specializuara për lokalizimim dhe kapjen e shtetasve në kërkim ndërkombëtar, me qëllim ekstradimin, pasditen e sotme, do të finalizojë me sukses një tjetër fazë të operacionit ndërkombëtar të koduar “The Wanted”.
Në kuadër të këtij operacioni, pritet që pasditen e sotme, të finalizohet me sukses ekstradimi nga Dubai, i të shumëkërkuarit Florenc Çapja 44 vjeç, banues në Elbasan.Për informacion më të detajuar, do të japim njoftim në momentin e finalizimit të operacionit të ekstradimit në Rinas.”, njoftoi Policia e Shtetit.
Gjykata e Posaçme e Apelit për Korrupsionin dhe Krimin e Organizuar ka lënë në fuqi vendimin në burgim të përjetshëm Florenc Çapjan, Ardjan Çapjan, dhe Jorgu Lekun, për vrasjen e Nezir dhe Gentian Beqiri, babë e bir.
Këta persona, sipas SPAK, kanë vepruar si grup i strukturuar kriminal, duke ekzekutuar në vitin 2012 në shenjë hakmarrjeje brenda shtëpisë së tyre, Gentian Beqirin dhe të atin e tij, Nezir Beqiri.
