Ashpërsohen përplasjet mes presidentit Ilir Meta dhe qeverisë. Ecuria e reformës në drejtësi po shqetëson presidentin, e për këtë arsye ka nisur një sulm frontal si ndaj qeverisë ashtu edhe ndaj organeve të reja të drejtësisë. Kreu i shtetit vijon t’i qëndrojë retorikës së tij se është në mbrojtje të Kushtetutës, duke kërcënuar me ngritje të popullit për revolta.
Në një prononcim për media Meta hodhi akuza se prej shumë vitesh Kushtetuta është shkelur disa herë me dashje, duke shtuar se përforcimi i themeleve kushtetues vjen vetëm përmes bashkimit me qytetarët. “Unë e mbroj Kushtetutën çdo ditë edhe në çdo moment, që nga çasti që kam vënë dorën mbi Kushtetutë, sepse kjo është detyra kryesore e Presidentit të Republikës. Padyshim që kjo nuk është vetëm detyrë e Presidentit, por është e të gjithë popullit shqiptar, i cili e ka miratuar Kushtetutën me referendum më 22 nëntor të vitit 1998 dhe i cili për fat të keq që nga ajo periudhë e deri më tani ka lejuar që t’i preket Kushtetuta me vend dhe pa vend në kohë të ndryshme duke tronditur themelet e shtetit të së drejtës, gjë që ndihet sot nga të gjithë qytetarët shqiptarë.
Kështu që unë besoj se presidenti sëbashku me qytetarët do të përforcojnë themelet e Kushtetutës, që u votua më 22 nëntor 1998. Kjo është detyra ime dhe është detyra e të gjithëve ne”, tha Meta. Edhe pse qeveria shtyu në kohë gjendjen e emergjencës, e cila nënkupton ndalimin e tubimeve apo protestave, presidenti duket se nuk tërhiqet nga vendimi i tij për tubime dhe revolta kundër qeverisë.
Meta shantazhon Dvoranin
Por sulmet e presidentit Ilir Meta kanë vazhduar edhe në drejtim të kreut të KED Ardian Dvorani, duke nxjerr një tjetër video shantazhuese ndaj tij. Përmes një postimi në rrjetin social Facebook, kreu i shtetit e cilësoi këtë video si spotin e dytë në mbrojtje të Kushtetutës, duke akuzuar kreun e KED se ka rrëmbyer kompetencat e presidentit nga përkrahja politike. “Si shpjegohet që Dvorani shkel Kushtetutën, ligjin, del mbi vendimet e KED dhe i rrëmben kompetencat kushtetuese presidentit? Sepse Dvorani nuk ndjek rrugën e Kushtetutës, por rrugën e partisë. Partia e mbajti 6 vjet në detyrë përtej mandatit kushtetues 9-vjeçar. Mjaft me sundimin e partisë.
Vetëm sundimi i Kushtetutës dhe ligjit. Këtë e kanë vendosur shqiptarët me referendum më 22 nëntor 1998”, thuhet në videon e Metës. Më tej, kreu i shteti deklaroi se Ardian Dvorani ka shkelur rëndë Kushtetutën, ku sipas tij ai nuk ka publikuar asnjë procesverbal të 32 mbledhjeve të KED në faqen zyrtare të Gjykatës së Lartë. “Ardian Dvorani, kreu i KED zero kompetencë në Kushtetutë. Kryetari i KED në raport me vendimmarrjen është vetëm një anëtar i KED dhe ka vetëm 1 votë. Kryetari i KED është vetëm një përcjellës i vendimeve të KED. Detyra më e rëndësishme e kryetarit të KED është publikimi i procesverbaleve të KED në faqen e Gjykatës së Lartë. Procesverbalet e 32 mbledhjeve nuk janë publikuar në kundërshtim me ligjin. KED nuk i ka renditur vakancat sipas radhës kushtetuese: Presidencë-Kuvend; Presidencë-Kuvend, por Presidencë-Presidencë; Kuvend-Kuvend.
Është vetëm një lojë personale e tij dhe në kundërshtim të plotë me vendimmarrjen e KED, që i ka miratuar vakancat në një ditë dhe sipas radhës Kushtetuese. Vendimin e KED të publikuar në 22 shtator 2019 në faqen e Gjykatës së Lartë, Dvorani e boton në Fletoren Zyrtare në 9 nëntor 2019”, thuhet në postimin e presidentit Ilir Meta. /Elisjeda Kiko
