Pavarësisht se kishte premtuar se do të largohej nga Presidenca, presidenti Ilir Meta duket se nuk ka ndërmend të dorëhiqet nga posti i kreut të shtetit. Pak ditë më parë në një studio televizive, presidenti Meta premtoi se do të jepte dorëheqjen nëse zgjedhjet parlamentare të 25 prillit do t’i fitonte Partia Socialiste.
Por PS i ka fituar tashmë zgjedhjet me plot 74 mandate, ndërkohë që zoti Meta jo vetëm që nuk ka ndërmend të dorëhiqet, por ka deklaruar se do të qëndrojnë në Presidencë deri në korrik të vitit 2022. Ka qenë zëdhënësi i presidentit, Tedi Blushi, i cili përmes një statusi në rrjetet sociale, zbuloi se Ilir Meta do të qëndrojë në detyrë deri në verën e vitit tjetër. Madje, Blushi bën me dije se Meta pasi të jetë larguar nga Presidenca në vitin 2022 do të marrë drejtimin e LSI.
“Presidenti Meta vlerëson fushatën e ndershme dhe model të LSI dhe sidomos rreth 110 mijë qytetarët, të cilët i rezistuan presionit të mafies, bandave, diskriminimit mediatik, survejimit dhe presioneve policore. Presidenti Meta në respekt të sakrificave për demokracinë, që ka bërë LSI, i njofton të gjithë anëtarët dhe simpatizantët e saj se më 24 korrik 2022 do të rikthehet për të marrë kartën e anëtarësisë së LSI dhe do t’u bashkohet përpjekjeve të të rinjve dhe të rejave për Shqipërinë e shqiptarëve”, shkruan ai.
Meta nis sulmet për zgjedhjet
Por ambicia për të mos u larguar nga Presidenca nuk është i vetmi lajm, pasi Ilir Meta ka bërë një ndryshim 180 gradë brenda dy ditësh. Dy ditë më parë përmes një mesazhi të shpërndarë në media, presidenti Meta vlerësoi zgjedhjet parlamentare të 25 prillit, ndërkohë që dje ka nisur sulmet ndaj tyre. Ka qenë zëdhënësi i tij, Tedi Blushi, i cili përmes një statusi të dytë në rrjetet sociale, akuzon kryeministrin Edi Rama se i vodhi zgjedhjet e së dielës, ndërsa ripërsëriti premtimin e Metës se ky i fundit do të qëndrojë në detyrë dhe nuk do të largohet.
“Për të gjithë sahanlëpirësit e Bablokut: Presidenti Meta di vetëm të mbajë fjalën! Presidenti Meta e ka bërë të qartë se nëse Edi Rama fiton 71 mandate në mënyrë demokratike do të japë dorëheqje. E gjithë Shqipëria e di si i ka fituar Babloku këto zgjedhje, ndaj qetësohuni: Nuk ka dorëheqje”, nënvizoi Blushi.
Meta: Do firmos dekretin për mbrojtjen e republikës
Megjithatë, presidenti Ilir Meta ka shkuar edhe më tej, ndërsa ka kërcënuar qeverinë dhe kryeministrin Edi Rama që të mos luajnë me nervat e tij. Përmes një statusi në rrjetet sociale, presidenti Meta është shprehur prerë dhe qartë se nëse provokohet nga socialistët, atëherë ai do të nxjerrë një dekret për të mbrojtur Republikën e Shqipërisë. Madje, Meta ka përdorur edhe parullën e artikuluar nga ballistët gjatë Luftës Nacionalçlirimtare për t’i dërguar mesazh kërcënues Edi Ramës.
“Kërcënimi i fundit, që vjen përmes Tao Taos, nga bandat e Elbasanit dhe të gjithë Shqipërisë ka vetëm një përgjigje: Presidenti, gati për të firmosur dekretin për mbrojtjen e republikës! Shqipëria e shqiptarëve! Vdekje tradhtarëve”, shkruan presidenti Ilir Meta. Ndërkohë, në mbështetje të presidentit Meta është rreshtuar edhe zëdhënësi i tij, Tedi Blushi, i cili përmes një statusi në rrjetet sociale i tregon muskujt Sekretarit të Përgjithshëm të PS, Taulant Balla që le të afrohet po ka kurajo e guxim.
“Tao Tao afrohu, afrohu! Se do ta marrësh përgjigjen ti dhe të gjithë armiqtë e Shqipërisë”, nënvizoi zëdhënësi i presidentit Ilir Meta, Tedi Blushi. Por edhe pse nuk e thotë se çfarë ka ndërmend të bëjë presidenti Ilir Meta, veprimet që mund të bëjë ky i fundit janë dy.
Veprimi i parë që pritet të ndërmarrë Meta, është ai i shpërndarjes së Parlamentit aktual përmes një dekreti, gjë që e ka deklaruar edhe më parë. Ndërsa veprimi i dytë është ai i mosdekretimit të qeverisë se re në shtator edhe pse kjo është e pamundur, pasi nëse e marrim të mirëqenë vendosmërinë e shumicës socialiste, deri atëherë Meta do të jetë shkarkuar. Pra, vetëm këto 2 rrugë i kanë mbetur Metës, pasi nxjerrja e dekretit që thotë ai për mbrojtjen e Republikës, nuk e njeh askush, e aq më tepër që një dekret është nul nëse nuk botohet në Fletoren Zyrtare.
