Presidenti Ilir Meta rrezikon të fusë në kaos Këshillin e Emërimeve në Drejtësi. Sot do të hidhet shorti për anëtarët e rinj të këtij institucioni dhe nuk përjashtohen surprizat. Vitet e shkuara shorti është hedhur nga Kuvendi, por sot ceremonia do të zhvillohet në ambientet e Presidencës.
Por të gjithë sytë e veshët i kanë tek vendimi që do të marrë Meta për Ardian Dvoranin. Gjykata e Lartë të vetmin kandidat që ka dërguar është Dvorani dhe sipas ligjit anëtari i kësaj gjykate duhet të jetë edhe kryetar. Por Dvorani është kthyer në armikun kryesor të presidentit dhe nuk është çudi që emri i tij të penalizohet. Kreu i shtetit pritet të kapet në dy pika kryesore për penalizmin e Dvoranit. Së pari, Meta ka bërë një padi penale kundër Dvoranit për shkelje të detyrës gjatë përzgjedhjeve të anëtarëve për vakancat për Gjykatën Kushtetuese. Ligji e përcakton qartë se një kandidat përjashtohet nga gara në momentin që ai është në ndjekje penale. Edhe padia e Metës kishte për qëllim pikërisht këtë gjë.
Por gazeta ka mësuar se prokuroria e ka administruar padinë, por nuk ka regjistruar asnjë procedim. Megjithatë frika se Meta mund të kapet te fakti se Dvorani ka shpërdoruar detyrën ekziston. Meta e ka thënë disa herë se Dvorani nuk duhej të ishte në atë zyrë. Madje ai akuzoi Kuvendin dhe ndërkombëtarët se e organizuan qëllimisht shortin një vit më parë që të futej Dvorani në KED dhe të bëhej kryetar. Pra, nga sa ka deklaruar deri tani, kreu i shtetit po jep sinjale se mund ta bllokojë kandidaturën e tij.
Mandati
Një tjetër pikë ku pritet të kapet presidenti është ajo e mandatit të Ardian Dvoranit. Që prej vitit 2014 atij i ka mbaruar mandati si anëtar i Gjykatës së Lartë. Por Dvorani vijon të qëndrojë ende në detyrë, duke pritur pasardhësin. Por PD e kundërshtoi qëndrimin e tij në detyrë dhe ju drejtua Kushtetueses, e cila në vitin 2016 mori një vendim kundër gjyqtarit. Sipas kësaj gjykate, ai duhej të dorëzonte detyrën. Mirëpo Dvorani nuk e zbatoi vendimin për shkak të afateve, duke u bazuar te përcaktimet e Kushtetutës së re të ndryshuar më 21 korrik.
Vendimi i Gjykatës Kushtetuese nuk hyri në fuqi deri në 12 gusht, kur ai u botua në Fletoren Zyrtare. Por Kushtetuta e re hyri në fuqi më 10 gusht. Kjo do të thotë se vendimi që largonte Dvoranin nga detyra u botua dy ditë pas hyrjes në fuqi të Kushtetutës së re. Pra përcaktimet e reja i japin të drejtë anëtarit të Gjykatës së Lartë të rrijë në detyrë derisa të vijë pasardhësi, ndërsa ka një vendim të Gjykatës Kushtetuese që nuk zbatohet. Kjo çështje pritet të shfrytëzohet nga presidenti për ta bllokuar. Megjithatë mbetet të shihet. Sot do të jetë një provë për Metën, i cili do të tregojë nëse është pro apo kundër reformës në drejtësi.
Përzgjedhja e anëtarëve
Por si përzgjidhen anëtarët e KED? Pika 3 e nenit 149/d të Kushtetutës së ndryshuar në vitin 2016, parashikon që presidenti i përzgjedh me short anëtarët e Këshilli të Emërimeve në Drejtësi, midis datave 1 dhe 5 dhjetor të çdo viti kalendarik, dy gjyqtarë nga Gjykata Kushtetuese, një gjyqtar nga Gjykata e Lartë (që edhe e drejton këtë institucion), një prokuror nga Prokuroria e Përgjithshme, dy gjyqtarë, dy prokurorë nga Gjykatat e Apelit, si dhe një gjyqtar nga Gjykatat Administrative. /Elisjeda Kiko
