Presidenti Ilir Meta rrezikon të çojë vendin drejt luftës civile. Duke anashkaluar Kushtetutën, kreu i shtetit ka vendosur dje të shtyjë datën e zgjedhjeve. Përmes një deklarate të shpërndarë për mediat, Presidenca ka njoftuar se presidenti e ka anuluar dekretin e 30 qershorit, duke vendosur kështu shtyrjen e zgjedhjeve, edhe pse nuk ka një datë të re.
Por lëvizja e presidenti duket se është një strategji për të futur në kaos vendin dhe kjo po bëhet madje duke shkelur me të dyja këmbët Kushtetutën.
“Duke ftuar të gjithë aktorët e përgjegjshëm vendas dhe ndërkombëtarë të bashkojnë kontributet konstruktive për rivendosjen urgjent të dialogut të pazëvendësueshëm politik dhe për gjetjen e një zgjidhjeje të shpejtë dhe që i shërben të ardhmes evropiane të Shqipërisë; Kam vendosur të shfuqizoj Dekretin nr. 10928, datë 05.11.2018 për zhvillimin e zgjedhjeve për organet e qeverisjes vendore më datë 30 qershor 2019.
Në komunikimin e parë ditën e hënë, datë 10 qershor, në mëngjes, Institucioni i Presidentit të Republikës do të bëjë publikisht me dije të gjithë argumentet shteruese kushtetues, ligjorë dhe logjikë që çuan në marrjen e këtij vendimi”, tha Meta. Ndryshe nga s ai takon një presidenti, Meta i bazon argumentet e tij te situata politike. Sipas tij është nevojë emergjente për të shmangur tensionet.
“Me vetëdije të plotë se kushtet aktuale nuk mundësojnë zhvillimin e zgjedhjeve të vërteta, demokratike, përfaqësuese dhe gjithëpërfshirëse. Zgjedhjet e lira dhe të ndershme janë kriter kryesor i Kopenhagës dhe në kushtet aktuale, për mungesë përgjegjësie të të dy palëve, po shkojmë drejt votimeve një partiake.
Në këtë mënyrë minohet çdo mundësi për çeljen e negociatave të anëtarësimit me Bashkimin Evropian, dëmtohet imazhi si vend anëtar i NATO-s dhe cenohet kryesimi i OSBE-në për vitin 2020”, ka thënë ai.
Meta puç kushtetues
Por veprimi i presidentit dje duket se është një puç kushtetues për të çuar vendin drejt përplasjes civile. Kryeministri Rama u shpreh dje se dekreti nuk do të pranohet dhe zgjedhjet do mbahen më 30 qershor. Kjo do të thotë se tani do të kemi një betejë të fortë kushtetuese, ligjore dhe politike.
PS thotë se do shkojë në zgjedhje, ndërsa presidenti nuk pranon. Por me këtë strategji Meta duket se i ka hapur rrugën Bashës për të sulmuar qendrat e votimit më 30 qershor. Deri më tani PD nuk kishte një argument të fortë për të bllokuar zgjedhjet, por tani Meta ja u dha një. Demokratët dhe LSI do pretendojnë se zgjedhjet janë të paligjshme sepse u anuluan nga presidenti. Kjo mjafton për të sulmuar votuesit dhe qendrat e votimit.
Ndërkohë militantët e PS pritet të reagojnë, gjë që do të thotë se do të kemi përplasje të fortë civile më 30 qershor. Po ashtu, një lëvizje e tillë e Metës duket se e fut presidentin në luftë me ndërkombëtarët. SHBA dhe BE e kanë bërë të qartë se zgjedhjet do mbahen më 30 qershor. Dje ishte zyrtari i DASH, Matheë Palmer, ai i cili dekalrois e zgjedhjet nuk duhet të lëvizin. “Data e zgjedhjeve është një vendim që e marrin shqiptarët dhe data 30 qershor u vendos nëpërmjet procedurave të përcaktuara të Shqipërisë”, tha Palmer.
Pra Meta dje u ka dhënë një goditje dhe amerikanve. Kushtetuta e përcakton qartë se presidenti e dekreton datën e zgjedhjeve 6 muaj para. Meta e dekretoi në dhjetor 30 qershorin dhe gjithçka u mbyll. Në njoftimin e djeshëm presidenti nuk jep asnjë nen ku bazohet. Pra duket se kemi një shkelje kushtetuese edhe kjo i hap mazhorancës të gjitha dyert që të shkarkojë presidentin.
E sigurt është që tani do kemi një situatë dyfish më të nxehtë dhe arkitekti i gjithçkaje është Ilir Meta. Pra duket se kjo ka qenë strategji e mirëmenduar e presidentit, i cili e tregoi qartë se është palë me Berishën për të futur në kaos vendin./Kliti Topalli/ Sot News/
