Në këtë vend e ke më kollaj të marrësh vesh se kur mund të shkarkohet një prokuror në Amerikë, apo si vepron gjykata në Itali apo në Zanzibar, sesa të marrësh vesh se çfarë ndodh kur një prokuror kamikaz, si Olsi Dado bën atentat ndaj demokracisë shqiptare duke ndaluar në mënyrë flagrante numrin dy të Partisë Socialiste dhe kryetarin e Bashkisë së Tiranës
Nga Ilir Yzeiri
Në këtë vend e ke më kollaj të marrësh vesh se kur mund të shkarkohet një prokuror në Amerikë, apo si vepron gjykata në Itali apo në Zanzibar, sesa të marrësh vesh se çfarë ndodh kur një prokuror kamikaz, si Olsi Dado bën atentat ndaj demokracisë shqiptare duke ndaluar në mënyrë flagrante numrin dy të Partisë Socialiste dhe kryetarin e Bashkisë së Tiranës, z. Veliaj, bashkëshorten e tij dhe gjashtë biznesmenë të njohur, pa asnjë provë.
Në këtë vend nuk kanë rëndësi opinionet e njerëzve të shquar të medias, të jurisprudencës, të akademikëve, të cilët kanë publikuar fakte rrëqethëse si psh: sa i takon arrestit me burg si masë paraprake ne ia kalojmë edhe Rusisë së Putinit, se edhe kur « Mani pulite », fushata e njohur në Itali kundër një klase të tërë politike, në kulmin e vet, kishte të arrestuar me burg 20% të të hetuarve ndërsa SPAK-u i Dumanit ka 36%, se kryetari i bashkisë së New Yorkut, i akuzuar me më shumë akuza se Veliaj vazhdon detyrën, pra vendi që i mësoi Dumanit, ndërsa Veliaj pa asnjë akuzë ndodhet në qeli.
Në këtë vend e ke të vështirë të kuptosh se si, në një kohë kur gjithë opinioni është vënë në alarm për ndërhyrjen flagrante në jetën demokratike dhe për kryerjen e një atentati ndaj demokracisë shqiptare nga një prokuror e një gjykatës fanatik partiak, organet më të larta që janë krijuar në vend për mbarëvajtjen e sistemit të drejtësisë si KLP- Këshilli i Lartë i Prokurorisë, KLGJ, Këshilli i Lartë Gjyqësor, dhe ILD Inspektori i Lartë i Drejtësisë kanë bërë vetëm një deklaratë të thatë dhe kanë kërkuar që ekzekutivi të mos ndërhyjë në punët e drejtësisë.
Po si mund të bëhet kjo deklaratë kur, nëse sheh ligjin organik të SPAK, të KLP-së, KLGJ-së, ILD-së ti do të vësh duart në kokë kur të shohësh aty që gjysma e neneve janë për privilegjet, pagat, lejet e pushimet dhe se ky ekzekutiv nuk ka bërë asnjë rezistencë, por i ka mbështetur të gjitha kërkesat e tyre për t’u siguruar pavarësi, qetësi dhe punë profesionale.
Zoti Metani,
Kam lexuar ligjin për organizmin e Prokurorisë së Posaçme dhe aty ka vetëm një nen në të cilin thuhet:
Neni 12
Prokurorët e Prokurorisë së Posaçme
3. Prokurorët emërohen në detyrë nga Këshilli i Lartë i Prokurorisë për një mandat nëntëvjeçar. Mandati pezullohet apo ndërpritet vetëm nëse Inspektori i Lartë i Drejtësisë kërkon procedim disiplinor kundër prokurorit.
Pra në nenin 3 thuhet se vetëm ju kini tagrin ligjor dhe mund të kërkoni pezullimin ose ndërprerjen e mandatit të prokurorit të Prokurorisë së Posaçme.
A mund të më thoni, i dashur Artur se çfarë duhet të bëjë tjetër prokurori Olsi Dado që ju të nisni hetimin disiplinor ndaj tij. Dhe tjetra, kur vihet në lëvizje institucioni juaj ?
A nuk ju mjafton tronditja që ka pësuar opinioni publik me fabrikimin e një akuze pa asnjë provë për të nisur një hetim ndaj këtij prokurori kamikaz ?
A ka të drejtë opinioni të njihet me mënyrën se si e keni ndjekur ju këtë shqetësim kombëtar që ka hedhur në erë besimin e shqiptarëve ndaj reformës në Drejtësi ?
P.S. Nuk po flas këtu për nenin dy pra për mënyrën se si është rekrutuar prokurori kamikaz Olsi Dado. Sepse atë do të duhej ta bënin organizma të tjera.
