Një tjetër incident është regjistruar në zgjedhjet e pjesshme vendore sërish në qarkun e Durrësit. Mësohet se pas përplasjes në lagjen 8 të qytetit mes komisionerit të PD-së dhe përfaqësuesve të foltores, i njëjti incident është përsëritur edhe në zonën e Spitallës në Durrës.
Këtë herë në përplasjen fizike, ka qenë dhëndri i Sali Berishës, Jamarbër Malltezi, i cili është goditur me grushta në ambjentet e shkollës . Ende janë të paqarta shkaqet e përplasjes.
Në orët e para të mëngjesit, gjithashtu është goditur edhe komisioneri i PD në një qendër votimit në Durrës, duke shënuar kështu incidentin e parë në zgjedhjet lokale të pjesshme të 6 marsit.
Mësohet se komisioneri Fadri Mezini është goditur jashtë QV 1499 në lagjen nr.8 në Durrës.
Kjo ka sjellë ndërprerjen për disa minuta të procesit të votimit. Ndërkohë policia ndodhet në vendin e ngjarjes.
Sot në bashkitë Shkodër, Durrës, Dibër, Lushnjë, Rrogozhinë dhe Vorë ka nisur procesi i votimit për të zgjedhur kryetarët e rinj. Në një deklaratë për mediat, kreu i KQZ, Ilirjan Celibashi bëri me dije se janë dy qendra votimi në Shkodër, përkatësisht në Pult dhe Shosh ku procesi i votimit nuk ka nisur ende, për shkak se komisionerët janë bllokuar në dëborë.
Ndërkohë moti ka shkaktuar probleme edhe në Dibër, ku në 18 qendra votimi mungon energjia elektrike dhe identifikimi i votuesve po kryhet manualisht.
Celibashi bëri me dije po ashtu se probleme me identifikimin elektronik ka patur edhe në një qendër votimi në Durrës. Nga ana tjetër në Vorë procesi i votimi në 22 qendra votimi ka nisur pa komisionerët e PD. Ata u përjashtuan për shkak se nuk ishin nga Vora. PD ka akuzuar se kjo po bëhet për të minuar procesin e zgjedhjeve në këtë bashki.
Janë 654,538 shtetas shqiptarë me të drejtë vote që do të duhet t’i drejtohen sot kutive të votimit për të zgjedhur kryetarët e rinj të bashkive. Të zgjedhurit në këto votime do të kenë një mandat 1-vjeçar. KQZ ka bërë me dije se janë 10,134 zgjedhës që votojnë për herë të parë. Në të 6 bashkitë do të jenë 941 qendra votimit që do të jenë të hapura nga ora 07:00-19:00.
