Arno Guexh është një emër i cili do të harrohet shpejt në Korçë. Mesfushori francez u afrua në merkaton e verës nga klubi korçar i cili po bënte gati një projekt me emra të rinj dhe ai shihej si një lojtar me perspektivë. Por gjërat nuk shkuan siç prisnin palët dhe në 12 ndeshje në kampionat e 2 në Kupë, ai mori rrallëherë vlerësime pozitive.
Lamtumira e tij në janar dukej e pashmangshme dhe ashtu ndodhi sapo korçarët siguruan zëvendësues në ditët e fundit të merkatos. Por futbollisti francez, duket se do ta kujtojë mirë këtë periudhë në Shqipëri, pasi në një intervistë të dhënë së fundmi ka shpërthyer në akuza kundër klubi korçar. Ai e etiketon në rënie klubin, me probleme financiare, ndërsa akuzon lojtarët shqiptarë se ishin kundër futbollistëve të huaj, duke ua vënë fajin për gjithçka.
“Një klub shqiptar, KF Skënderbeu, erdhi dhe më kërkoi nga Zirka në Ukrainë. Herën e parë, unë e refuzova. Pastaj ata erdhën për herë të dytë më kërkuan, pasi isha futbollist i lirë. Më thanë që Skënderbeu është klubi i parë në Shqipëri, kishin shumë pjesëmarrje në Ligën e Europës. Fakti që ata më kërkuan disa herë më pëlqeu ndaj u nisa drejt kësaj aventure. Ishte fundi i merkatos dhe më duhej të gjeja një klub, Firmosa, por në fund gjërat nuk shkuan siç desha”, kujton fillimisht lojtari 21-vjeçar i cili pohon se pas mbërritjes në Shqipëri, ka gjetur një atmosferë ndryshe, me Skënderbeun që nuk ishte më aq solid sa ia kishin përshkruar edhe për shkak të dënimit të UEFA-s.
“Unë isha në dijeni të 2-3 gjërave para se të vija. Por nuk ishin asgjë në krahasim me çfarë gjeta aty. Kam folur me disa lojtarë që kanë luajtur shumë sezone aty dhe më kanë treguar se klubi është në situatë të keqe, në rënie, mbi të gjitha sa u përket rezultateve. Njoha të njëjtin problem si në Ukrainë, me vonesa pagesash. Unë prisha kontratën pasi kisha probleme në klub.
Nuk jam një njeri që hedh m… mbi të tjerët, por nuk e kuptoj pse lojtarët vendas ishin kaq shumë kundër të huajve! Nuk e di nëse kjo ndodhte se mos i zija vendin, por ishte situatë shumë e veçantë. Kur gjërat nuk shkonin siç duhej, ishte faji ynë. Një ditë, menaxheri i cili më propozoi Skënderbeun, më telefonoi pas ndeshjes dhe më tha që nuk e kuptonte pse lojtarët nuk më jepnin pasime në fushë… Na vunë shkopinj mes rrotave dhe kur nuk je pastaj i preferuari i trajnerit gjërat komplikohen”, theksoi Guexh në këtë intervistë të tij
