Letër-porositë e tjera të dërguara nga SPAK drejt vendeve të huaja duket se po e mbajnë nën ankth kreun e Partisë së Lirisë Ilir Meta.
Shtetet e Bashkuara të Amerikës i janë përgjigjur së fundmi një letërporosie të përcjellë vitin e kaluar nga SPAK sa i takon dosjes së lobimit. Dokumenti amerikan detyroi të gjithë kupolën e LSI që të zbarkojë një nga një në dyert e SPAK.
Ndërkohë Meta është ende në ankth pasi të tjera prova tronditëse pritet të vijnë për strukturën-antikorrupsion.
SPAK pret përgjigje nga Qipro, Austria dhe San Marino të cilat duhet të japin përgjigje për ndërhyrjet estetike disa milionëshe të denoncuara nga avokati Idajet Beqiri për familjen Meta. Janë bashkuar disa kallëzime për
Ilir Metën dhe të gjitha për pastrim parash që po hetohen nga prokurori Sotir Kllapi. Pra SPAK ka shtrirë hetimet në disa vende si në Qipro, Austri, Itali dhe në San Marino dhe të gjitha shërbejnë për të “qepur” mirë dosjen e Metës.
Hetimet për pastrim të parave
Ilir Meta është në ankth pasi dosja e tij e pastrimit të parave shumë shpejt pritet që të zgjerohet. Kreu i PL u vu nën hetim nga Struktura e Posaçme Kundër Korrupsionit dhe Krimit të Organizuar vitin e kaluar.
SPAK ka regjistruar të paktën tre procedime penale mbi bazën e disa kallëzimeve ndaj Ilir Metës, për shpërdorim detyre, korrupsion pasiv, pastrim parash, fshehje pasurie, mashtrim me deklaratën e pasurisë etj. Në kërkesën e parë, të bërë publike nga vetë SPAK, thuhet se hetimet nisën në funksion të procedimit penal të regjistruar pas kallëzimit të ish-deputetit Halit Valteri.
SPAK kërkoi në atë kohë një kopje të formularit të vetëdeklarimit, sipas ligjit të dekriminalizimit. Ish-deputeti Valteri, në kallëzimin e bërë në qershor të vitit 2022, kërkoi që për Ilir Metën, Monika Kryemadhin dhe një sërë drejtuesish të LSI, që kanë qenë dhe në poste të larta shtetërore si gjatë koalicionit me PS ashtu dhe PD, të hetohen bazuar në shkrime të mediave vendase dhe të huaja për fshehje të pasurisë dhe deklarim të rremë. Përveç kësaj kërkohen shpjegime për paratë e dyshimta që ka shpenzuar Kryemadhi jashtë vendit.
Ndërhyrjet estetike disa milionëshe të Kryemadhit
Ishin disa transaksione bankare të zbuluara nga shërbimet partnere që konfirmojnë pastrimin e qindra mijëra euro nga Monika Kryemadhi dhe Ilir Meta për ndërhyrje estetike. Thuhet se ka dokumente që konfirmojnë një transaksion bankar të Monika Kryemadhit, me vlerë 287 mijë euro, për ndërhyrje estetike në fytyrë, në një klinikë në San Marino.
Transaksioni nuk është deklaruar nga Monika Kryemadhi në ILDKP. Sipas dosjes që po hetohet nga SPAK, dyshohet se jo vetëm Kryemadhi, por edhe Meta dhe fëmijët e tyre kanë kryer trajtime estetike që arrijnë vlera marramendëse në një klinikë private në San Marino, “Casa di Cura Private Domus Medica”.
Të dhënat e çiftit gjenden në kartelat mjekësore të spitalit dhe provohen me hyrje-daljet e sistemit TIMS, thuhet në dosjen që çoi në SPAK Idajet Beqiri, i cili përmend një rast kur trajtimin estetik e ka bërë deputetja.
Sipas transfertës së datës 4 qershor 2018, paguar nga një llogari anonime nga një bankë offshore në Qipro, trajtimi kap vlerën e 287.650 euro. Asnjëra nga këto pagesa nuk është deklaruar në deklaratat vjetore të tyre, që do të thotë se kanë paguar me para të përfituara nga aferat korruptive, që i kanë futur në bankë në rrugë të jashtëligjshme.
Detaje nga letër-porositë që trembin Metën
Letër-porosia nga amerikanët ishte përvëluese, por akoma nuk ka mbaruar e gjitha pasi avokati që i kallëzoi për korrupsion dhe pastrim parash thotë se kjo gjë vërtetohet nga kartelat mjekësore. A kanë kryer ndonjëherë ndërhyrje mjekësore apo estetike çifti Meta dhe personat e bashkëlidhur me ta që janë rrethi më i ngushtë, pyesin në letër-porosi prokurorët e SPAK.
Ata kërkojnë po ashtu prova shkresore që vërtetojnë diçka të tillë dhe mënyrën si është kryer pagesa, në rast se ndërhyrje të tilla kanë ndodhur bëjnë me dije burimet. Pra kjo situatë tregon dhe gjendjen e rëndë dhe alarmante të Ilir Metës këto ditë që rend nëpër konferenca dhe bën thirrje për protesta pas muajsh qetësi. / Nga Sidorela Braçja
