Prokuroria e Posaçme Antikorrupsion do të ketë pjesë të saj 7 dikastere. Do të jetë Kancelari, i cili do mbajë statusin e nëpunësit civil më të lartë të Prokurorisë së Posaçme. Ai mbikëqyr veprimtarinë e personelit administrativ, administron mjediset e punës, dosjet, arkivin, shërbimet mbështetëse dhe financat e Prokurorisë. Kancelari përgjigjet para Drejtuesit të Prokurorisë së Posaçme.
Kancelari i Prokurorisë së Posaçme kryen funksionin e Sekretarit të Përgjithshëm për Prokurorinë e Posaçme dhe është përgjegjës për përgatitjen, zbatimin, kontrollin e brendshëm financiar, monitorimin, raportimin, kontabilitetin dhe auditin e brendshëm të buxhetit të Prokurorisë së Posaçme, në përputhje me përcaktimet e këtij ligji dhe të legjislacionit për menaxhimin buxhetor dhe financiar.
Do ngrihet po ashtu Sektori i Dokumentacionit. Ky sektor mbledh në mënyrë sistematike të dhëna për rastet e korrupsionit dhe krimit të organizuar. Si dhe krijon dhe mban një bazë të dhënash që shërben si burim informacioni në procedimet për vepra penale, të parashikuara në nenin 75/a të Kodit të Procedurës Penale. Pjesë e Prokurorisë Speciale do jetë Sektori i Ekspertizës.
Aty do ketë personel ekspertë që ndihmojnë në hetime dhe mund të dëshmojnë në gjyq. Ekspertët duhet të jenë të specializuar në fusha të ndryshme për të ndihmuar Prokurorinë e Posaçme në ushtrimin e funksioneve të saj. Prokuroria ka të paktën një ekspert kontabël dhe një ekspert të teknologjisë së informacionit. Më pas vjen Sektori i Hetimit Financiar. Ky sektor verifikon mjetet financiare dhe pasuritë e personave nën hetim dhe raporton rezultatet te prokurori i posaçëm kompetent.
Do ngrihet gjithashtu Sektori i Bashkëpunimit Ndërkombëtar dhe Ndërlidhjes për Hetimet e Përbashkëta. Ky sektor është përgjegjës për koordinimin e punës së saj me autoritetet e shteteve të tjera. Sektori shërben si ndërlidhës me organet e huaja në shërbim të ecurisë së hetimeve apo hetimeve të përbashkëta.
Prokuroria e Posaçme do ketë një sektor që ofron shërbime për individët me status të posaçëm, sipas parashikimeve të Kodit të Procedurës Penale, përfshirë viktimat e krimeve, të cilët janë brenda kompetencave të kësaj prokurorie, si dhe për dëshmitarët në hetimet dhe çështjet e ndjekura nga kjo prokurori, në përputhje me legjislacionin në fuqi. Në fund do ketë dhe një koordinator për mediat.
