Superjahti me vlerë 450 milionë paund i një oligarku rus po qëndron prej gati 2 vitesh i braktisur në brigjet e Triestes në Itali.
Jahti është në pronësi të manjatit rus dhe mikut të Putinit, Andrey Melnichenko. Ai është sekuestruar nga autoritetet italiane në mars të vitit 2022 pas vendosjes së sanksioneve të Bashkimit Europian ndaj Rusisë, për sulmin ushtarak në Ukrainë.
Që prej asaj kohe, jahti vijon të qëndrojë i bllokuar në gjirin e Triestes, në detin Adriatik. Ai është një nga jahtet më të mëdhenj në botë, me përmasa 100 metra i lartë dhe 143 metra gjatësi. Ai kaloi testet e fundit në Gjibraltar në vitin 2017 para se ti dorëzohej në atë kohë manjatit rus. Ndërsa nuk ka dalë në det të hapur që prej marsit të vitit 2022, mediat italiane kanë raportuar se qeveria e shtetit fqinj ka shpenzuar 6 milionë paunde për mirëmbajtjen e jahtit që prej bllokimit të tij.
Melnichenko është pronar i kompanisë së plehrave EuroChem Group, si dhe të një kompanie qymyri. Ai është një nga njerëzit më të pasur në botë dhe një nga 37 biznesmenët që u takuan me Putinin pas pushtimit të Ukrainës për të diskutuar mbi sanksionet e vendosura nga Perëndimi.
