Presidentit Thaçi i ka ndodhur një gjë e rrallë në Kosovë. Ai ka dekoruar 20 personalitete me rastin e 10 vjetorit të Pavarësisë së Kosovës, por 13 prej tyre kanë refuzuar dekoratën. Mes tyre dhe Prof. Rexhep Qosja, Veton Surroi etj.
Kjo e ka vënë në pozitë të vështirë Presidentin i cili po mundohet ti anulojë dekoratat, duke i quajtur propozim.
Pas kësaj Jari i ka nisur një letër Presidentit Thaçi ku e udhëzon si ta zgjidhë në vazhdim ëështjen e dekoratave.
“I nderuar zoti Thaçi!
Nga përvoja ime si President, çështja e dekoratave është çështja që kam pasur më shumë sukses. Në një periudhë 5 vjeçare kam dekoruar mbi 2 mijë vetë dhe asnjë nuk ma ka kthyer dekoratën. Suksesi qëndron në disa parime strikt që kam ndjekur.
E para mos dekoro kurrë njerëz të shquar, profesorë, mendimtarë, intelektualë, apo nga këta që mendojnë se kanë bërë gjëra të mëdha për Kombin. Ata të bezdisin, kanë huqe dhe nuk ti pranojnë dekoratat, se mendojnë se janë më të mençëm se ne.
Unë e di ç’kam hequr ti lija në dorë një dekoratë Ismail Kadaresë dhe ai për pak e harroi në restorant nga bezdia.
Që nga ajo kohë hoqa dorë dhe nuk dekoroja më njerëz të rëndësishëm, përveç Doktorit që ma kërkoi vetë. Pastaj më kërkoi dhe krushku i tij dhe e dekorova. Pastaj ma kërkoi dhe mamaja e nuses djalit të tij, ja dekorova. Pastaj më kërkoi Akiu i Vjenës që bën ato picat afër Operës e dekorova. Bile i dhashë “Urdhërin e Skënderbeut”, se e ka picerinë afër Muzeut ku rri përkrenarja e Skenderbeut.
Pastaj parukierja ime më tha se do dilte në pension dhe kishte nevojë për një dekoratë ja dhashë. Pastaj çfarë të them unë, gjithë Shqipëria në rresht për dekorata. Aman asnjëri nuk ma ktheu. Të gjithë më kanë falenderuar dhe më kanë sjellë dhurata mirënjohjeje, kush ndonjë shishe raki, djathë, pula, vezë etj.
E dyta mos i bëj publike dekoratat pa i marrë, se të gjen belaja. Pasi ti marrin e bën një njoftim në shtyp dhe mbaron punë. Për shembull kur ja dhashë Pacollit se bëra njoftim se këtu xhindosen njerëzit kot. Unë kisha një tokë të gruas në Durrës, ja dhashë të ma ndërtonte një pallat, pastaj erdhën ata dhe i dhashë një dekoratë dhe nja 15 shtetësi për fisin Pacolli.
U kënaqëm.
Këshilla e fundit që kam për dekoratat është ti japësh pas vdekjes. Këtë ma ka mësuar Doktori. Ai gjithë armiqtë e tij i vlerëson pasi vdesin. Atëhere nuk kanë çfarë të thonë dhe ata që të kanë inat. Ata vdesin, ti u fut një dekoratë dhe ata s’kanë çfarë të bëjnë më. Kështu je në rregull dhe me historinë dhe me punën.
Shpresoj të të hyjnë në punë këto këshilla miqësore. Unë tani i papunë jam, po deshe ndihmë, vij dhe të asistoj si President për dekorata.
I juaji Jari!”
