Gjykata Kushtetuese pritet të vendosë këtë javë për zgjedhjet vendore të 30 qershorit të vitit 2019 dhe fatin e presidentit Ilir Meta.
Gazeta e deklaroi pak ditë më parë se fundi i muajit qershor do të shënojë dhe seancat më kritike që do të mbahen në Kushtetuese dhe duket se kjo javë do të arrijë kulmin. Kështu, ditën e mërkurë në orën 10:00, shtatë anëtarët e Gjykatës Kushtetuese kanë parashikuar të zhvillojnë seancën e parë sa u përket zgjedhjeve vendore të vitit 2019.
Ka qenë kryetarja e Shoqatës së Bashkive, kryebashkiakja anë detyrë e Shkodrës, Voltana Ademi, e cila ka kërkuar pavlefshmërinë e votimeve të 30 qershorit për zgjedhjen e kryebashkiakëve, pasi e konsideroi procesin e zgjedhjeve lokale të vitit 2019 si antikushtetues për shkak të mungesës se alternativave në zgjedhje. Kështu që, pasnesër do të vendoset nëse zgjedhjet vendore të 30 qershorit të vitit 2019 ishin legjitime apo ilegjitime.
Megjithatë, cilido që të jetë vendimi për 30 qershorin, vendi do të shkojë në zgjedhje të pjesshme lokale në plot 6 bashki, të cilat janë pa kryetar, për shkak se 3 prej të zgjedhurve socialistë janë larguar, pasi kanë qenë subjekt i ligjit të dekriminalizimit. Bëhet fjalë Bashkinë e Mallakastrës, kryebashkiaku i së cilës pritet të shkarkohet dhe 5 bashki të tjera, sikundër është ajo e Durrësit, Shkodrës, Vorës, Rrogozhinës dhe Dibrës.
Kushtetuesja pritet të caktojë datën për shkarkimin e Metës
Por zgjedhjet vendore të 30 qershorit të vitit 2019 nuk janë e vetmja “patate e nxehtë” në duart e shtatë anëtarëve të Gjykatës Kushtetuese. Gazet ka mësuar se këtë javë Kushtetuesja do të vendosë se kur do të nisë diskutimin për kërkesën e mazhorancës për shkarkimin e presidentit Ilir Meta.
Pak ditë më parë vendimi i Kuvendit i është dorëzuar zyrtarisht gjykatës, e cila ka 3 muaj kohë për t’u shprehur. Mirëpo, për të miratuar kërkesën duhet që të votojnë pro të paktën 5 nga 7 anëtarët. Kështu që, nisur nga ndjeshmëria e lartë që ka vendimi i Parlamentit të Shqipërisë, i cili e shkarkoi nga detyra me plot 104 vota presidentin Meta, mbetet të shihet se çfarë vendimi do të marrë Gjykata Kushtetuese për këtë çështje.
Ndërkohë, një tjetër temë që ose do të shuajë tensionet ose do t’i shtojë edhe më shumë është dhe çështja e Teatrit Kombëtar. Pasi ka dëgjuar palët javën e shkuar trupa e Kushtetueses është tërhequr për të marrë vendim. Mazhoranca dhe bashkia e kanë mbrojtur procedurën e ndjekur për shembjen. Ndërsa Aleanca për Mbrojtjen e Teatrit dhe Presidenca i kanë konsideruar veprimet antikushtetuese ndaj dhe kanë kërkuar rindërtimin ku ishte dhe si ishte. Por edhe pse u tha që vendimi do të zbardhej të premten, mesa duket anëtarët e Kushtetueses ende nuk kanë arritur në përfundim, ç’ka do të thotë se duhet të presim.
