Nga Anri Bala
Ilir Meta e ka vendosur dhe nuk ndërron mendje… përderisa ulëret çdo ditë që ta dëgjojmë të gjithë, se ai nuk e ka me shaka kur thotë, se votimet s’kanë mbaruar dhe nuk heq dorë nga prerja apo linçimi i çdo personi që ka guxuar “të fus duart” e të shtrembëroj vullnetin e popullit.
Në këtë pikë, po sipas presidentit, nuk bënë përjashtim dhe gruaja e tij “super Monika”, e cila mbeti e ve pas “vdekjes” së Metës kryetar partie e shtëpie dhe lindjen e Presidentit, kryetarin e shtetit… Në fakt, ka të ngjarë se Iliri burri Monikës me Ilirin burrin e Republikës, mos t’i ngjajnë fare njeri tjetrit…! Iliri i Monikës ishte miku i Ramës që e bëri president, kurse Iliri i Republikës, është armiku i Ramës dhe “xhelati” i Monikës, që pritet t’i priten duart, sapo të vërtetohet akuza e vjedhjes së votës.
Mirëpo, Meta duhet të marrë disa masa paraprake, sepse marrja e një vendimi është si kryerja e një krimi, i cili kërkon disa përgatitje. Në fillim Ilirit i duhet një hanxhar, sepse me kos e me sfurk nuk arrin të bëj ekzekutime, maksimumi disa synetlliqe. Më pas i duhet të ngrej një trekëmbësh në një vend publik, për ta vërtetuar që është i veprave, sepse burrëria ,vërtetohet me vepra dhe jo me fjalë.
Ilirit, burrit të Republikës i duhet një protezë për Monikën, sepse ish-bashkëshortja e tij, edhe sikur të dyja duart t’ia presësh, nuk mund të rri dot pa futur “cungjet” në xhepat plot edhe bosh. Ç’është e vërteta, një protezë mekanike do i bënte shumë nder, për tu justifikuar vjedhjet, e mbrojtur nga çdo akuzë, se nuk janë duart e saj, por duar të vdekura, që nuk kanë asnjë ndjeshmëri kur prekin paranë.
Ilirit i duhet një litarë, nëse ai do gjymtoi Monikën, do të ndjehet keq e në faj kur të kuptoj se pa shpirtin e tij binjak ai nuk i hyn në punë kujt, as vetes dhe as Republikës së Lalëzit…
E pas gjithë kësaj, Rama duhet të gjej një president për Republikën, duke qenë se nuk ka “shpëtuar” akoma nga hanxhari d.m.th brisku, sepse opozita e Metës e ka një alibi provë: Vjedhje me anë të mashtrimit, “përdorimi i funksioneve shtetërore, për të bërë detyrën, për të cilën të ka mandatuar populli”.
Rama duhet të nxitoj, jo për të na bindur se ka bërë zgjidhjen e drejtë, si dikur, kur deklaronte se edhe nëse do votohej sot për Presidentin, ai përsëri Ilir Metën do votonte… por për të zgjedhur një president të vërtetë, që përfaqëson unitetin kombëtar, por edhe dakordësinë e grupimeve politike.
Jo për ne, por për veten e tij, që qeveria e shtatorit mos të ngeli peng i paranojave, fantazive dhe dëshirës për zhbërjen e Kushtetutës nga një njeri si Meta, që deri tani ka dhënë prova për qëllimet e tij të mbrapshta… deri në vdekje kundra shtetit ligjor, Edi Rama duhet të laj borxhin Republikës, duke i dhënë presidentin dhe presidencën që meriton. /Ekskluzive.al
