Me këtë protestë Berisha dërgoi mesazhin që unë jam faktor stabiliteti dhe destabiliteti, prandaj qasja ndaj tij duhet të ndryshoje në këmbim të stabilitetit. Përndryshe ai premton të bëjë destabilitet dhe kaos…
Shkruan Romeo Kara
Përgjithësisht protestat e organizuara nga Berisha janë karakterizuar si mesazhe force.
Nëse ju kujtohet, ish-kryetari i SHIK-ut, Fatos Klosi, ka theksuar se pikërisht për shkak të dhunës që Berisha përdorte nëpërmjet protestave të tij, ai ishte bërë një faktor i tillë i rëndësishëm, aq sa pas çdo vendimi, që merrte qeveria socialiste e asaj kohe (1997-2005), ajo shtronte pyetjen: “Si do të reagonte vallë Berisha”?
Pra, Berisha si një populist profesionist, ka ditur dhe di ta përdorë kur i leverdis gjuhen e rrugës, dhunën, shantazhin dhe presionin.
Përgjithësisht atij i ka ecur kjo mënyrë të vepruari, pasi nëpërmjet populizmit rrëmbeu në kundërshtim me statutin e PD-së, kreun e saj më 1991, përjashtoi prej saj një pjesë të themeluesve të saj. Në 1992 pas zgjedhjeve lokale të kohës, përqendroi tërë pushtetin në duart e tij dhe iu bëri të ditur bashkëpunëtorëve dhe kundërshtarëve të tij se ai njihte vetëm ligjin dhe gjuhën e forcës.
Sa herë i ka leverdisur Berisha ka kërcënuar nëpërmjet rrugës për destabilizim, duke imponuar vullnetin e tij sipas kërkesave të kohës. Ai di ta përdorë mirë kulaçin dhe kërbaçin.
Në vitin 2017, ai instaloi një çadër proteste në bulevard, vetëm me qëllimin që komisioni hetimor parlamentar lidhur me privatizimin e OSSH-se të mos konkludonte me një raport kundër tij dhe kallëzim penal gjithashtu.
Ishte pikërisht ai që përshëndeti marrëveshjen Rama-Basha të Majit 2017 për bashkëqeverisje si një win-win story.
Metoda duket e njëjtë, por qëllimi dhe mesazhi disi më ndryshe këtë radhë.
Berisha është në pikë të hallit.
Ai është përçinosur nga State Department, në murin e turpit të njerëzimit, si një super i korruptuar dhe pengmarrës i demokracisë në Shqipëri.
Këtë përballje ai nuk e ka me Ramën.
Si burracak që është, ai kërkon të fshihet pas PD-se apo një pjesë të saj, duke vërtetuar katërcipërisht që ai e ka parë PD-në gjithmonë si një vegël të denjë për t’i shërbyer atij dhe të bëhet therror për të.
Se ku ka shkelur dhe çfarë ka bërë, këtë gjë e di më mirë ai dhe USA-t, por, unë jam i sigurt, që ai e ka tejkaluar cakun, përndryshe USA-t janë shumë tolerante dhe karakterizohen që, kanë stomak të fortë e të aftë, për t’i neglizhuar keqbërësit e niveleve të ulëta e të mesme.
Me këtë proteste Berisha dërgoi mesazhin që unë jam faktor stabiliteti dhe destabiliteti, prandaj qasja ndaj tij duhet të ndryshoje në këmbim të stabilitetit. Përndryshe ai premton të bëjë destabilitet dhe kaos, gjë qe nuk i leverdis as USA-s dhe as Europës në këto momente përballje me Rusinë në teatrin ukrainas.
Mesazhi është vetëm për USA-t.
Ata duhet të zgjedhin midis Berishës non grata dhe destabilitetit të varur prej tij.
Kjo dukej edhe nga fjalimi më i dobët dhe më i përçartur i tij politik që u mbajt dje, i cili nuk i përgjigjej në asnjë pike platformës së paralajmëruar të protestës.
Fjalimi i tij ishte thjesht një mesazh i koduar i cili merrte vlerë nga numri i njerëzve në protestë.
Armiqësia që ai i shpalli Ramës, ishte mesazh i qartë destabiliteti.
Tashme ai po i kërkon edhe Ramës të rreshtohet përkrah tij, përndryshe do të minojë qeverisjen dhe stabilitetin politik.
Pavarësisht se ka disa jave që po prononcohet si antirus i thekur, nëpërmjet këtyre mesazheve të destabilitetit ai po i dërgon sinjale bashkëpunimi pikërisht atyre të cilët iu leverdis më tepër se kurrë një trazim i kësaj pjesë të Ballkanit.
Duke ditur hallin e Berishës, duke njohur ekzaktësisht karaktetin narcist të tij, që nuk ka asnjë lidhje me heroizmin, patriotizmin dhe humanizmin, unë e lexoj si shenjë të qartë antiamerikanizmi dhe kërcënimi për destabilitet, protestën e organizuar, frymëzuar dhe sponsorizuar në mes të vapës, nga Berisha. /Pamfleti
