Një gjykatë britanike pranoi lirimin me kusht të Harriet Bridgeman, e arrestuar për qëllim ekstradimi në Shqipëri, si pjesë grupit të përfshirë në vrasjen e biznesmenit Ardian Nikulajt.
Avokatja mbrojtëse e Harriet Bridgeman parashtroi kërkesën për liri me kusht duke bindur gjykatën, teksa ngriti pretendimin se ajo kishte një rol të limituar në ngjarje.
“Ajo ka një rol të limituar në ngjarje krahasuar me të tjerët. Thjesht është parë në atë lokal. Shkoi në Shqipëri për pushime. E la Shqipërinë 12 ditë përpara vrasjes. E mësoi vrasjen nga rrjetet sociale. Nuk ka asnjë tendencë të zhduket. Nuk ka asnjë lidhje familjare me Shqipërinë apo vende të tjera. Ka një vajzë 7 vjeçe dhe është e divorcuar nga burri.
Nëse mbahet në burg i limitohet kontakti me fëmijën. Ka probleme mendore prandaj është e papunë dhe merr asistencë sociale. Mbajtja në burg do t’ia përkeqësonte shëndetin. 20.000 paund është garancia nga babai i saj”, tha ajo, sipas burimeve të gazetarit Muhamed Veliu.
Burime nga grupi hetimor bënë sot me dije për mediat se personi i katërt, i përfshirë në vrasjë, Harry Simpson është lokalizuar në Britaninë e Madhe dhe është kërkuar arrestimi i tij, mirëpo gjykata angleze ka refuzuar që të firmosë urdhër-arrestin.
