Deputetët demokrat kanë shpërthyer në akuza ndaj ish-kryeministrit Sali Berisha. Kambanë alarmi e ka cilësuar deputeti demokrat, Dash Sula vendimin e Partisë Popullore Europian për t’i hequr PD-së për të votuar në Kongres.
Teksa ishte dje i ftuar në një studio televizive, Sula thotë se mosmarrja pjesë në PPE është një mesazh shkatërrimtar për partinë. Kjo sipas Sulës, është një situatë për të ardhur keq dhe fajtor sipas tij, është Berisha.
“Kambanë alarmi, më vjen keq që nga Berisha duhet të kuptojmë se është një situatë për të ardhur keq”, tha Sula. Ndërkohë, edhe Patrik Sadikaj thotë se duhet një reflektim si nga ish-kryetari i PD-së, por edhe nga Sali Berisha i cili pretendon se drejton partinë.“Kuota zero në listën e të ftuarve të partive anëtare, nuk ndodh shpesh që të jetë pa të drejtë vote.
Nuk e kemi luksin të shkojmë në këtë pikë. Vendimi i PPE për të mos na përfshirë me të drejtë vote. Ky duhet të ketë një moment reflektimi për të gjithë, ish-drejtuesit, ata që pretendojnë se e drejtojnë sot dhe ata që duan ta drejtojnë nesër”, tha Sadikaj.
Marku: Zgjedhja e Berishës thellon krizën në PD
Ndërkohë, pedagogu Mark Marku teksa ka komentuar situatën në PD ka deklaruar se zgjedhja e ish-kryeministrit Sali Berisha në krye të PD nuk e zgjidh krizën, përkundrazi sipas tij e thellon atë.
Ai tha se PD duhet të riformatohet, pasi edhe në të kaluarën sipas tij ka plot raste që partitë e mëdha politike janë zhdukur nga skena.“Në gjykimin tim kjo s’e zgjidh krizën, përkundrazi e thellon. Kur ka një krizë asnjëherë nuk bëhet fajtor njëra palë. Kur duhet të zgjidhen konflikte dhe kriza duhet bashkëndarë përgjegjësia. Mendoj që kushdo që të fitojë në këtë betejë të brendshme, mendoj që problemi është përtej. Nëse do ta shërosh sëmundjen duhet të bësh ekzaminimin dhe duhet të shkosh te diagnoza e saktë.
Në këtë kuptim mendoj që problemi themelor është ky, në PD kurrë nuk kanë guxuar apo dashur të artikulojnë që të bëhet analiza e thellë e PD në këto 30 vite. Mendoj që PD është vonë. Problemet ajo i ka pasur. Duke i mbuluar në ritmin e politikës, duke qenë në aksion, ndonjëherë e bën të pamundur refleksionin. Është akt i përditshëm dhe nuk krijon mundësi të mendosh.
Problemet kanë ardhur duke u thelluar. Problemi i arrogancës së liderit. Ky problem ka të bëjë me partinë e tipit lider të krijuar nga ’92 e këtej. Raporti i çdo grupi, ministrukture brenda PD është përcaktuar në raport me liderin. Ai ka përcaktuar se kush është i drejtë.
Askush s’ka guxuar të dëgjojë liderin. Vijmë te përplasja që është personash se sa idesh. Ka një vit që PD është në gjendje të një lufte të brendshme civile, s’kemi parë ide të qarkullojnë në treg. Të gjitha janë të përqendruara te personi.
Nuk kemi pasur debat të tipit produktiv. Në rastin e PS, që është parti në pushtet, vetë pushteti e shtyn problemin”, tha ai. Marku deklaroi se opozita duhet të riorganizohet.
Sipas tij, kriza në PD mund të vazhdojë për shumë gjatë.“Opozita e ka të domosdoshme të riorganizohet shumë shpejt. Këto janë njerëz fatkeq. Nuk mendojnë që mungesa e opozitës është fatkeqësi për këdo. Ideja është që diktatorët edhe kur nuk kanë armiq i shpikin ato. Unë mendoj që kjo krizë mund të vazhdojë edhe gjatë, pafund. Kriza mund të vazhdojë dhe nuk shoh premisën bazë”, tha ai.
