Gjyqtarët, prokurorët, ministrat, ish-ministrat, deputetët dhe bosët e krimit, duke filluar nga dita e sotme nuk do të jenë më të paprekshëm. Për plot 29 vite drejtësia është përdorur sipas interesit nga të gjitha forcat politike. Kjo ka bërë që të gjithë të korruptuarit t’ia hedhin paq për çdo aferë. Por duke filluar nga sot, duket se do mbesin pa gjumë shumë emra. 8 prokurorët e Prokurorisë së Posaçme do të betohen sot në Presidencë dhe pas kësaj mund të quhet me plot gojën se SPAK ka marrë jetë. S
injalet se ky organ do të sjellë tërmet në radhët e të korruptuarve u dhanë dje në Këshillin e Lartë të Prokurorisë. Ky këshill zhvilloi intervistat me 3 emrat që kanë shfaqur interes për të qenë kryetarë të Prokurorisë së Posaçme. I pari që shpalosi platformën ishte prokurori Altin Dumani. Ai paralajmëroi se nëse zgjidhet në krye të SPAK, do të nisë një epokë e re në luftën ndaj krimit e korrupsionit. Sipas tij, të gjithë do jenë të barabartë para ligjit, pavarësisht postit që mbajnë. “Përgjegjshmëria në trajtimin e çështjeve është thelbësore për SPAK. SPAK do të bëjë të mundur që çdokush që ka shkelur ligjin, kushdo qoftë ai do ndëshkohet.
SPAK do të godasë krimin e organizuar dhe korrupsionin. Në mbështetje të vizionit tim kam paraqitur një plan të detajuar funksional për funksionimin e këtij institucioni. Kjo prokurori do godasë paligjshmërinë. Do bëjë të mundur një Shqipëri që kush shkel ligjin do të dënohet. Fokus i veçantë do jetë bashkëpunimi me qytetarët. Dështimi i Prokurorisë së Posaçme nuk do të jetë asnjëherë një vizion”, tha Dumani.
Ngritja e Byrosë së Hetimit
Më tej Dumani deklaroi se prioritet i punës së tij do të jetë dhe ngritja e Byrosë Kombëtare të Hetimit. Sipas tij, ky organ është shumë i rëndësishëm dhe nuk do të ketë asnjë vonesë në konstituimin e tij. “Duhet organizuar puna sipas specializimeve që kanë prokurorët dhe duhet emëruar drejtuesi e BKH sa më parë. SPAK do të synojë të ketë në administratën e saj njerëz profesionistë, me integritet të lartë. Do të jem shumë kërkues ndaj kritereve për përzgjedhjen e administratës. BKH duhet të ketë njerëz me integritet të mirë moral. Për këtë duhet joshje, dhe është pikërisht paga për të thithur në P. Posaçme, ekspertët më të mirë. Na është premtuar se kategoria e pagave do jetë në nivel të kënaqshëm. Unë do mëshoj shumë për të gjetur ekspertë të motivuar, që duan të punojnë e nuk kanë parësore anën financiare. Ta shohin këtë institucion si parësor. Ky vend ka njerëz të tillë, shpresojmë të thithim këtë kategori. Pas zgjedhjes së kreut të BKH, fokusi do të kalojë te zgjedhja e pjesëtarëve të BKH”, tha ai më tej.
Platforma e Edvin Kondillit
Një tjetër emër që ka shfaqur interes për të kandiduar për postin e kryetarit është Edvin Kondilli. Edhe ai u shpreh se prioritet do jenë dosjet e korrupsionit dhe krimit të organizuar, si dhe ngritja e Byrosë së Hetimit. Ai deklaroi se nëse merr këtë post, do ketë afate të qarta hetimore dhe do rritet bashkëpunimi me agjencitë partnere brenda e jashtë vendit. “Prokurori është përgjegjës për të gjitha veprimet e veta. Organizimi i veprimit për çështjet nën hetim, protokolle hetimore konkrete me afate të qarta hetimi. Puna në grup, një qëllim i përbashkët i gjithë SPAK: aplikimi i hetimeve proaktive për hetime pasurore. Opinioni publik pret rezultate konkrete dhe është detyra jonë parësore të vijmë në pritshmërinë e tij. Bashkëpunimi me agjencitë e tjera ligjzbatuese me rëndësi të veçantë: efektiv, në kohë sa më të shkurtër dhe me mjetet më të përshtatshme për çdo çështje. Marrëdhënia me publikun është shumë e rëndësishme dhe bashkëpunuese sigurisht pa cenuar sekretin hetimor”, tha ai. I pyetur se cila është arma e tij më e fortë me dy kandidatët e tjerë ai tha: “Kam eksperiencë prej 15 vitesh si prokuror, por asnjëherë drejtues. Por kjo nuk më demotivon, pasi bazohem në të gjithë eksperiencën time ku kam patur rastin të prek çdo aspekt të hetimit të një çështje”.
Platforma e Arben Krajës
Emri i tretë që shpalli platformën dje është prokurori Arben Kraja. Ai u shpreh se e njeh shumë mirë fushën ku kandidon, pasi ka punuar me ndërkombëtarët për draftet e para të SPAK dhe BKH. Kraja deklaroi se me drejtimin e tij do ketë më shumë transparencë. “Jam i ndërgjegjshëm për punën që na pret për ngritjen dhe efektivitetin e kësaj strukture. Kam eksperiencë drejtimi e cila garanton suksesin tim në drejtim të institucionit. Drejtuesi do të ketë eksperienca menaxheriale, njohuri administrative, financiare. Kam bashkëpunuar me organizatat ndërkombëtare për draftimin për sekuestro parandaluese, për imunitetin e zyrtarëve të lartë. Kërkoj besimin e KLP për të drejtuar këtë institucion të ri ku të vë në praktikë aftësitë e mia drejtuese. Kam punuar me asistencën ndërkombëtare për draftet e para për funksionimin e SPAK dhe ngritjen e BKH. Publiku të informohet në kohë për fillimin e hetimeve dhe për rezultatet e hetimeve. Do të kemi 2 seksione: kundër krimit të organizuar dhe kundër korrupsionit të zyrtarëve të lartë”, tha prokurori. Ndërkohë sot KLP do të zhvillojë mbledhjen e radhës, ku do të bëhet përzgjedhja e kreut të SPAK dhe në këtë mënyrë nis lufta ndaj të korruptuarve. /Kliti Topalli
