Pas ndryshimeve të fundit kushtetuese mijëra demokratë janë sy e veshë se çfarë do të thotë Doktori për këtë çështje. Shumë prej tyre i shkruajnë Karminës me shpresë se ajo mund t’i qartësojë.
Karmina është e paqartë pse kanë shumë interes demokratët për këtë çështje, tani në kulmin e plazhit. Ajo shkon çdo natë tek vila në Lalz dhe Doktori nuk flet për këtë çështje në sy të saj. As me Zenin nuk ka diskutuar në sytë e saj. Vetëm një ditë e dëgjoi që po shante dikë në telefon dhe po i thoshte “Ai është një kretinë, kjo është shah mat, ai nuk kupton nga politika. Unë nuk merrem më me të.”
Karmina kujtoi se po shante Edi Ramën, po pastaj Zeni i tha se po shante Lulin. Pas kësaj ajo u konfuzua dhe i kërkoi analistit Qim Peka t’i bënte një shpjegim.
“Heshtja e Doktorit është strategji e PD për të shkatërruar Edi Ramën. Edi Rama është mësuar me Lulin që e kupton që larg se çfarë mendon e çfarë do veprojë.
Doktori nuk është Luli. Ai ka planin e tij. Plani i tij tani është të heshtë. Nëse hesht, Edi Rama trembet se mendon se ai po përgatit revolucion dhe kjo mund ta shtyjë të bëjë gafa të rënda.
Nga ana tjetër Doktori nuk do të bëjë publike ato që mendon për Lulin në këto momente pasi nuk do që të përçahet opozita. Ai ka një plan për të korrigjuar humbjen e Lulit me një koalicion të fortë opozitar.
Ky është misoni i tij i fundit. Nëse Luli nuk ja del dot dhe me listën që do bëjë Doktori atëhere duhet të hapë krahun.
Ai mendon se në këto momente duhet forcuar LSI dhe i duhet dhënë gjysma e listës. Pastaj në listë duhet futur dhe Vetëvendosja dhe partitë e tjera të vogla që janë aleate të PD. Për Doktorin nuk ka rëndësi kush është me PD, por kush mbledh vota, ndaj ai është duke përgatitur një plan.
Dhe derisa ta bëjë planin nuk e tregon se kjo është rruga e vetme të shkatërrojë Ramën përmes makthit, ndërkohë që Luli është i kënaqur nga heshtja e tij”!
