Zbatimi i rregullave të reja në futboll ndodh shpesh të mos pritet mirë, sidomos nga ata që janë të lidhur shpirtërisht me këtë lojë e sidomos teknikët dhe ndihmësit e tyre.
Kështu, ideja më e fundit në botën e futbollit është aplikimi i kartonit blu si një formë ndëshkimi i përkohshëm për një futbollist, një propozim që ka acaruar dhe tensionuar lojtarë e trajnerë. Kartoni blu do të jepej në rastet kur arbitri nuk është i vendosur për kartonin e kuq dhe në këtë formë do të akordonte atë blu, për ta përjashtuar një futbollist për dhjetë minuta.
Këtë ide e komentoi së fundmi trajneri i Liverpul, Jurgen Klop. Gjermani është qartësisht kundër kësaj ideje duke theksuar se ata që vendosin rregullat në futboll, nuk kanë pasur kurrë një ide të mirë dhe të duhur ndërsa shtoi se po e komplikojnë më kot futbollin.
“Unë mendoj se futbollin duhet ta mbajmë të thjeshtë pasi kështu është më e lehtë edhe për arbitrat. Nëse shtojmë një tjetër karton, atëherë shtojmë edhe më shumë polemika, më shumë diskutime. Njerëzit do të nisin të diskutojnë nëse ishte karton i kuq apo karton blu. Këto vetëm sa e komplikojnë më shumë futbollin. Ata po e testojnë këtë ide dhe unë nuk e kam problem, por nëse e vendosin si rregull nuk e di si ta komentoj.
Nuk më duket një ide e bukur dhe të them të drejtën ata që merren me rregullat nuk kanë pasur kurrë ide të bukura mbi futbollin”, u shpreh Klop. Po si qëndron e vërteta rreth kartonit blu? Këtë e sqaron vetë FIFA në një njoftim paraprak për mediat, duke vënë theksin se propozimi është në fazën e parë eksperimentale dhe do të ndodhë në kategoritë e ulëta të futbollit anglez.
Sipas “The Telegraph”, IFAB (Bordi i Federatës Ndërkombëtare të Futbollit) i ka dhënë dritën jeshile eksperimentimit të kartonit blu, që do t’i lejonte arbitrit të ndeshjes të largonte nga fusha për 10 minuta lojtarët që protestojnë në formë agresive. Ose kryejnë faulle taktike për të ndërprerë lojën. Revolucion i madh në lojën më të bukur me top, që pritet të aplikohet në fillim në ligat e ulëta të futbollit anglez.
Ndërkohë, kombinimi i dy kartonëve blu ose një kartoni blu pas atij të verdhë, do të sillte përjashtimin nga loja. Njësoj si kartoni i kuq. “FIFA dëshiron të sqarojë se artikujt për të ashtuquajturin karton blu në nivelet elitare të futbollit janë të pasakta dhe të parakohshme. Ashtu si çdo provë, nëse do të zbatohej, testimi do të duhej të kufizohej në nivelet më të ulëta, një pozicion që FIFA synon ta përsëritë kur kjo çështje të diskutohet nga IFAB më 2 mars”.
