Solidariteti ndërkombëtar ndaj banorëve të Durrësit dhe Thumanës nga tërmeti tragjik i 26 nëntorit vijon. 15 milionëeuro u dhuruan dje nga Këshilli Europian. Kështu deklaroi presidentja e Komisionit Europian, Ursula Von der Leyen, ndërsa kujtojmë se që në ditën e parë Komisioni Europian ka ardhur në ndihmë në mobilizimin e ekipeve të kërkimit, ku plot 200 persona zbarkuan në Shqipëri, të nënshtetësive të ndryshme.
“BE është në solidaritet të plotë me Shqipërinë. Komisioni ka ndihmuar në mobilizimin e ekipeve të kërkimit me një staf prej më shumë se 200 personash nga disa vende të BE-së. Hapi i parë ndërkohë është që të alokojmë menjëherë nga fondi i fqinjësisë 15 milionë euro në mbështetje të popullit shqiptar. Gjithashtu kemi vendosur për zhvillimin e një konference të përbashkët donatorësh”, deklaroi presidentja e Komisionit Europian, Ursula Von der Leyen. Forcat emergjente të shumë shteteve europiane dhe ballkanase iu bashkuan shqiptarëve që në mëngjesin e 26 nëntorit për të bërë të mundur shpëtimin e banorëve që mbetën nën rrënojat e pallateve të rrënuar.
Organi i akuzës nuk ndalet me punën e hetimit në zonat më të prekura nga tërmeti tragjik i 26 nëntorit. Me prioritet Thumanën, prokurorët dje kanë mbledhur provat materiale në tre pallatet që u shembën nga tërmeti fatal i 26 nëntorit që mori 26 jetë njerëzish, la të plagosur shumë të tjerë, dhe të pastrehë. Por, përpos pallatit që mori jetë njerëzish, organi i akuzës “vizitoi” edhe pallatet e tjera të cilat u cilësuan si të pabanueshme.
Pallatet në fjalë, 7 në numër u shembën disa ditë më parë me ekskavator nga IKMT-ja, pasi ishin rrezik për banorët që banonin rreth tyre. Shkolla e shembur një ditë më parë në Thumanë gjithashtu ishte në listën e prokurorëve. Këta të fundit dje morën mostrat e nevojshme, hekur, beton, tulla, që do të dërgohen në laboratorë për tu analizuar dhe në përfundim të përcaktohet fortësia e tyre. Shkolla në fjalë ishte rikonstruktuar në gusht të këtij viti.
Teksa prokuroria po heton, në terren ka zbritur dhe ministri Sandër Lleshaj. Pallati 12 katësh në Lezha ishte destinacioni i radhës për ministrin. Banorët e këtij pallati kanë kërkuar një ekspertizë të dytë pasi ishin të pasigurt për të hyrë në banesat e tyre pas tërmetit. Gjatë vizitës së tij të dytë, ministri Lleshaj e ka cilësuar kërkesën e banorëve “zhurmë për asgjë”, duke deklaruar i bindur se pallati i tyre është i sigurt. Lleshaj më tej i siguroi se ekspertiza është bërë jo vetëm nga shqiptarë, por izraelitë, duke i ftuar të kthehen në banesat e tyre. Gjithashtu, ministri Lleshaj i bëri thirrje të mos hapin panik.
“Jemi këtu për të dytën herë për shkak të shqetësimit të banorëve të këtij pallati, po ta shkurtoja të gjithë përkufizimin e kësaj situate do të thoja “shumë zhurmë, për asgjë”. Në harkun e 24 orëve janë bërë dy ekspertiza, një nga ekspertë shqiptarë dhe një nga izraelitë dhe konkluzioni është i njëjtë, nuk ka asnjë problem me sigurinë e tij. Dua t’i ftoj banorët të kthehen në shtëpi dhe të na lënë mundësi që të merremi me problemet e tjera. Probleme ka shumë, po jo këtu. Këtu njerëzit duhet të kthehen në jetën e tyre të përditshme, se nuk ka asnjë gjë për t’u shqetësuar. Mos bëni zhurmë kot, lus ata që duan tëna ndihmojnë t’i bashkohen forcave, nëse nuk duan të na ndihmojnë të heshtin, as të mos përhapin panik.
Nuk ka asnjë problem, merrni vesh shqip apo jo”, tha Lleshaj. Gjithashtu në takimin e tij, Lleshaj u përball me ish-deputeten e PD-së Lindita Metaliaj. Kjo e fundit i kërkoi ministrit t’i tregojë ekspertët dhe ti kërkojë falje popullit të Lezhës për sjelljen e tij.
Ornela Çelpica
