Këshilltari i kryeministrit Edi Rama, Baton Haxhiu ka komentuar situatën politike në vend dhe veçanërisht ato brenda Partisë Socialiste. Teksa ishte i ftuar në një studio televizive dhe duke analizuar se çfarë do të ndodhë në Kongresin e PS parashikuar më 9 prill, Baton Haxhiu u shpreh se defekti i Partisë Socialiste vjen nga pasojat e qeverisjes 2017-2019 dhe Kongresi pas fitores së PS.
“Të qeverisës vetëm për 4 vite është të harrosh opozitën, të harrosh konkurrencën dhe të harrosh kontrollin”, tha Haxhiu. Më tej sipas këshilltarit të kryeministrit Edi Rama, Baton Haxhiu, një problem në Partinë Socialiste është ekzistenca e klaneve brenda PS.
Madje zoti Haxhiu theksoi se në parti ka më shumë një luftë brenda llojit se sa me kundërshtarin për arsye se ndihen shumë komod pas përçarjeve në PD. “Tirana është evidente se kush e fiton garën për kryetar të Partisë Socialiste dhe shihet si pasardhës i lidershipit”, nënvizoi këshilltari i kryeministrit Edi Rama, Baton Haxhiu.
Ndërkohë që për analistin Andi Bushati, i cili ishte i ftuar në të njëjtën studio televizive me zotin Haxhiu, kreu i Partisë Socialiste po përpiqet të ringjallë trupin e sëmurë dhe të korruptuar të partisë që drejton përmes një elektroshoku. Madje Bushati theksoi se lëvizjet e Ramës vijnë për shkak të zhvillimeve brenda Partisë Demokratike që zien brenda vetes.
“PS ka ngelur e fjetur, po të shkosh në bazën e PS i gjithë preokupimi është ca tenderësh lokalë ka”, deklaroi ai. Më tej analisti Bushati shtoi se kryeministri Edi Rama ka gjetur problemin por jo zgjidhjen. “Ngjallja nuk bëhet dot me ceremoni, por duhet lojë demokratike e vërtetë”, nënvizoi analistin Andi Bushati.
