Sekretarja e Thesarit e Shteteve të Bashkuara, Janet L. Yellen shpalli një rregull të ri mbi raportimin e pronësisë përfituese sipas Ligjit të Transparencës së Korporatave.
Lidhur me këtë rregull të ri, ka ardhur një reagim edhe nga Ambasadorja e SHBA në Tiranë, Yuri Kim, e cila thekson në rrjetet sociale, se do të çojë akoma më përpara punën për të luftuar korrupsionin në SHBA dhe në botë. “Ky rregull do të çojë akoma më përpara punën për të luftuar korrupsionin dhe efektet e tij gërryese mbi demokracinë dhe sundimin e ligjit – si në vend ashtu edhe në mbarë botën”, shkroi ajo.
Nga ana tjetër, dje ambasadorja e Shteteve të Bashkuara, Yuri Kim vizitoi mjediset e Manastirit të Shën Vlashit në Durrës, ku takoi pjesëtarët e Korpusit të Paqes, të cilët ka pak ditë që kanë mbërritur në vendin tonë. Janë 19 vullnetarë të Korpusit të Paqes, prej të cilëve 12 do të punojnë në vendin tonë dhe 7 në Mal të Zi.
Fillimisht ata do të qëndrojnë 3 muaj në Lezhë ku do të trajnohen në qendrën e tyre e më pas do të shpërndahen në qytete të ndryshme të vendit tonë dhe të Malit të Zi. Vullnetarët do të sistemohen në shtëpitë e banorëve të zonës. Ndërkohë vullnetarëte dje i përshëndeti edhe zonja Kim. “Jam entuziaste për ju se do nisni rrugëtimin më emocionues të jetës suaj. Ky do jetë një rrugëtim ku ju do ndryshoni njëri tjetrin.
Gjithashtu do largoheni prej këtij me kujtime, do largoheni me gjëra konkrete se ju do i sillni përfitim komuniteteve në të cilat do vendoseni. Është një shprehje që e përdorin shpesh në Shqipëri: ‘Kur ju të vini në shtëpinë tonë, kur të shkelni në pragun tonë, mund të mos kemi shumë çka për t’iu ofruar, por kemi bukë, kripë e zemër”, nënvizoi ambasadorja Kim.
