Mjeku Myftar Torba ka sqaruar deklaratën e tij që bëri bujë se korrupsionit në mjekësi i jepet fund nëse legalizohet bakshishi, ku dhënia e zarfit të parashikohet si një pagesë për punën e bluzave e bardha.
Sipas mjekut, vetëm zyrtarizimi i bakshishit mund të sjellë edhe një mënyrë të re menaxhimit të spitaleve dhe të vlerësimit të mjekëve sipas perfomancës së tyre. Ai deklaroi se “nëse nuk do të ekzistonte bakshishi, asnjë mjek nuk do të qëndronte të punonte në spitalet shtetërore”.
“Autonomia spitalore, kriteret e perfomancës, futja urgjentisht i skemës së sigurimeve shoqërore, financim jo me buxhet historik. nëse nuk do të kishim bakshish sot asnjë mjek nuk do të qëndronte të punonte në spitalet shtetërore”, tha Torba për Top Talk.
Sipas tij, një mjek sot me 30 vite eksperiencë paguhet 800 mijë lekë të vjetra, aq sa një kuzhinier apo ndonjë hidraulik.
“Secili mjek duhet të paguhet sipas ngarkesës së punës që ka, operacioneve. Sot kemi kirurgë në rrethe që rastet e rënda na dërgojnë ne dhe marrim pagë njësoj sa ne. Unë jam për ndëshkimin e atyre që vendosin me detyrim pagesën për kryerjen e operacioneve apo të shërbimeve.
Bakshishi të shkojë te sporteli me faturë dhe të ndahet më pas sipas ngarkesës. Bakshish kanë dhënë dhe vazhdojnë dhe japin, e zgjidhja është autonomia spitalore. Shërbimi shëndetësor, është një shërbim që duhet paguar. Nuk është një shërbim që duhet të jetë si në kohën e Enverit”, tha kirurgu.
