Këshilli i Lartë Gjyqësor ka përcaktuar trupën gjykuese që do të shqyrtojë dosjen e ish-ministrit Saimir Tahiri. Pasi Gjykata e Lartë e ktheu në Apel, ka pasur pengesa për caktimin e trupës gjykuese, por KLGJ vendosi të caktonte gjyqtarë nga rrethet.
Irgerta Hysi është gjyqtarja e tretë që i bashkohet dy gjyqtarëve të caktuar më parë për çështjen, Daniela Shirka dhe Engert Pëllumbi. Vakanca u krijua pasi Ilirjana Olldashi kishte dhënë dorëheqjen.
Seanca e parë për gjykimin e ish-ministrit dhe ish-drejtorit të Policisë së Vlorës Jaeld Cela, është caktuar për t’u zhvilluar më 20 dhjetor në orën 09:00. “Komunikohet në mënyrë të përmbledhur se, për çështjen në ngarkim të pandehurve S.T. dhe J.Ç., e regjistruar pranë Gjykatës së Posaçme të Apelit për Korrupsionin dhe Krimin e Organizuar më datë 24.11.2021, me nr. 47 regjistri themeltar, është planifikuar seanca gjyqësore në datë 20.12.2021, ora 09:00.
Pas plotësimit të trupit gjykues, ka rezultuar se çështja do të shqyrtohet nga kryesuese – gjyqtarja Daniela Shirka, anëtar – gjyqtari Engert Pëllumbi dhe anëtare – gjyqtarja Igerta Hysi”, thuhet në njoftimin e Apelit të GJKKO-së. Kujtojmë se Tahiri u akuzua për tre vepra të rënda penale, “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”, në kuadër të dosjes “Habilaj”.
Por të gjitha ranë poshtë dhe ai u dënua për shpërdorim detyre. Më 25 nëntor dosja ndaj ish-ministrit dhe ish-zyrtarit, u regjistrua në Gjykatën e Posaçme të Apelit. Gjykata e Lartë mori vendimin më 28 shtator për të rikthyer çështjen për Tahirin në apelin e GJKKO me trupë tjetër gjykuese, duke rrëzuar kërkesën e SPAK për rigjykim në shkallë të parë.
Kujtojmë se në nëntor të 2017-ës, Gjykata për Krime të Rënda rrëzoi të gjitha akuzat e ngritura ndaj ish-ministrit dhe e dënoi vetëm për shpërdorim detyre, pasi në vendimin e arsyetuar të Gjykatës dhe në analizë të gjitha provave të paraqitura nga Prokuroria, nuk rezultonte asnjë fakt, që ta përfshijë ish-ministrin në trafikun e drogës dhe bashkëpunimin me grupin kriminal të Habilajve. Tahiri u dënua me 5 vite burg, por që u konvertua në 3.4 vite shërbim prove.
Ja sesi Apeli e ktheu çështjen për rishqyrtim
Kujtojmë se Apeli i Posaçëm e vlerësoi si të gabuar rikualifikimin e veprës penale për ish-ministrin dhe ktheu dosjen për rigjykim. Trupa gjykuese u shpreh se nuk kishte asnjë provë për shpërdorim detyre, për të cilën u dënua Tahiri, duke kërkuar rigjykimin e dosjes nga e para.
Vendimi i Shkallës së Parë që dënoi Tahirin me 3 vite shërbim prove u rrëzua kështu që Tahiri nisi betejën nga e para me drejtësinë. Arsyeja pse Gjykata e Apelit e kthehu edhe një herë hetimin për Tahirin në pikën zero është se kishte vënë re disa parregullsi. Në vendim thuhej se Gjykata e Krimeve të Rënda kishte rrëzuar 3 akuzat që ishin ngritur nga ana e prokurorisë, duke ngritur një akuzë të re për shpërdorim detyre dhe për këtë arsye Gjykata e Apelit u shpreh se nuk mund të jepte një vendim dënimi ndërkohë që nuk ishte bërë asnjë hetim. /ALEKSANDRA HOXHAJ
