Komisioni Evropian ka publikuar raportin më të fundit mbi progresin e Shqipërisë drejt integrimit evropian, duke vënë theksin te gjendja e shtetit të së drejtës. Edhe pse raporti njeh disa zhvillime pozitive, veçanërisht në përfundimin në shkallën e parë të procesit të vetingut për gjyqtarët dhe prokurorët, pjesa më e madhe e vlerësimit përqendrohet në kritikat e forta ndaj funksionimit të drejtësisë, luftës kundër korrupsionit, pavarësisë së medias dhe institucioneve demokratike.
Në fushën e drejtësisë, Komisioni vëren se, ndonëse reformat kanë avancuar, mbeten probleme të theksuara në zbatimin e tyre. Vlerësimet dhe emërimet e anëtarëve jo-magjistratë në Këshillin e Lartë Gjyqësor dhe atë të Prokurorisë nuk janë kryer me ritmin dhe cilësinë e nevojshme. Inspektorati i Lartë i Drejtësisë, megjithëse tashmë funksional, përballet me mungesë të theksuar të inspektorëve magjistratë, çka ndikon në punën e tij. Gjithashtu, raporti ngre shqetësimin për ndikimin e mundshëm politik mbi sistemin gjyqësor, duke theksuar se përpjekjet për ndërhyrje nga zyrtarë apo politikanë janë shtuar.
Një tjetër problem serioz është zvarritja e proceseve gjyqësore dhe rritja e stokut të çështjeve të pashqyrtuara, ndërsa masat për rritjen e efikasitetit ende nuk janë zbatuar. Ndërkohë, edhe pse është alokuar një buxhet për ndërtimin e një sistemi modern elektronik të menaxhimit të çështjeve gjyqësore, ai pritet të jetë plotësisht funksional vetëm në vitin 2030.
Në fushën e luftës kundër korrupsionit, raporti vlerëson rezultatet e strukturës së posaçme SPAK, por paralajmëron se kuadri ligjor për parandalimin e korrupsionit ende nuk është i plotë. Institucionet me rol parandalues vazhdojnë të kenë ndikim të kufizuar dhe mungesë bashkëpunimi me organet e rendit. Policia e Shtetit vlerësohet si e ndjeshme ndaj korrupsionit, ndërsa transparenca në kontrollin e deklaratave të pasurisë mbetet e pamjaftueshme.
Një tjetër pjesë e raportit i kushtohet lirisë së medias, ku kritikat janë të shumta. Autoriteti i rregullimit audio-viziv dhe transmetuesi publik nuk gëzojnë pavarësi të plotë, ndërsa koncentrimi i lartë i pronësisë së medias në duart e bizneseve me lidhje politike vazhdon të jetë një shqetësim i madh. Raporti kritikon gjithashtu ndarjen jo transparente të reklamave shtetërore dhe burimeve publike për media, si dhe vëren shtim të sulmeve verbale e fizike ndaj gazetarëve, përfshirë përdorimin e padive strategjike për t’i heshtur.
Mandatet e Avokatit të Popullit dhe Komisionerit për Diskriminim ende nuk janë rinovuar, gjë që kufizon punën e këtyre institucioneve.
Sa i përket shoqërisë civile, Komisioni vlerëson se organizatat janë të lira të funksionojnë, por hasin ende në pengesa ligjore dhe mungesë të mbështetjes financiare publike.
