Kryeministri Edi Rama ka zhvilluar dje një mbledhje online me Komitetin Teknik të Ekspertëve. Kjo mbledhje vjen pas sulmeve të bëra, se pse ky Komitet ka raportuar mbi situatën jashtë fokusit mediatik. Kësisoj kryeministri Rama duket se ka vendosur ta bëjë këtë takim për të sqaruar gjithë skeptikët dhe ata që e kishin sulmuar deri më tani.
Sakaq gjatë kësaj mbledhjeje Komiteti i Ekspertëve hodhi dritë mbi situatën në vend dhe bëri me dije se situata është në kontroll, por duhet të ruhet në maksimum vigjilenca. Më tej ekspertët shuan zërat, që pretendonin se do të ketë një valë të dytë virusi në vjeshtë. Ata sqaruan se diçka e tillë nuk do të ndodhë. “Nuk do të ketë një valë të dytë të COVID-it në vjeshtë, por gjithçka mbetet në dorë të qytetarëve për të zbatuar me përpikmëri distancimin social e protokollet e sigurisë”, u shprehën ekspertët. Kryeministri Rama ndau të njëjtin shqetësim në lidhje me sjelljen dhe kujdesin e vetë qytetarëve, në mënyrë që situata të mos precipitojë.
“Realisht jam i shqetësuar për mundësinë që në kushtet e hapjes, njerëzit fillojnë të harrojnë që faktikisht jemi të hapur, por e kemi mes nesh këtë armik të padukshëm dhe nëse nuk respektojmë rregullat, mund të biem pre e një invazioni tjetër, sepse vala e dytë, sikundër e kam dëgjuar prej jush, nuk është një riardhje e virusit me forca të reja, por është faktikisht një dorëzim i njerëzve për shkak të sjelljes së gabuar në pushtetin e virusit që është këtu faktikisht”, u shpreh Kryeministri. Rama theksoi se deri në datën 18 maj pothuajse i gjithë biznesi do jetë rihapur, përveç transportit publik, për të cilin ende nuk ka një vendim për hapje. “Plani është i qartë. Deri në datën 18, ne do jemi mbi 90% të liruar. E vetmja gjë që mbetet shqetësim është transporti publik, me autobusë apo fugona, sidomos ndërqytetas, por edhe në qytet. Po shikojmë akoma të gjejmë një formulë kompromisi lidhur me këtë”, u shpreh ai.
Pas 2 javësh zgjerohet sërish fasha orare
Ministrja e Shëndetësisë, Ogerta Manastirliu, iu përgjigj disa shqetësimeve të qytetarëve në një lidhje online. Sa i takon fashës së orareve të lëvizjes, ministrja Manastirliu tha se po diskutohet me ekspertët mundësia e zgjerimit të lëvizjes dhe aktivitetit. “Fasha orare është propozuar nga ekspertët për të minimizuar kontaktet, por po diskutohet që të zgjerohet. Pasi të kemi vlerësimin dy javor, atëherë do të kemi mundësinë edhe për të zgjeruar fashën orare të lëvizjes së qytetarëve dhe aktivitete të tjera”, tha Manastirliu. Ndërsa për transportit urban, Manastirliu u shpreh se është me risk shumë të lartë, por po hartohen protokolle me ekspertë për të pasur një vlerësim se kur mund të kemi hapje të tij. “Është shqetësim edhe për ne, pasi transporti urban është me risk më të lartë.
Po hartojmë protokolle me ekspertë dhe shumë shpejt do të kemi një vlerësim dhe për hapjen e transportit urban në vend”, tha ajo. Më tej ajo sqaroi se në datë 18 maj do të hapen lokalet vetëm për hapësirën e jashtme. “Më 18 maj do të hapen bare dhe restorante vetëm në hapësirat e jashtme. Patjetër që do të ketë një rivlerësim edhe për fashën orare, por kjo do të bëhet sipas zonave të kuqe e të gjelbra. Pas vlerësimit, do të shohim si do të zhvillohet ky aktivitet”, sqaroi ajo. Sa i takon rihapjes graduale që po bëhet, kryeministri Edi Rama shprehu një tjetër shqetësim pas momentit të rinisjes së fluturimeve dhe hyrjeve nga vendet e tjera nga kufijtë tokësorë. Për kryeministrin, sfidë do të jetë respektimi i rregullave të karantinimit./ARBJONA ÇIBUKU
